Мазкур ҳолат юзасидан Ижтимоий ҳимоя миллий агентлигининг Андижон вилояти бошқармаси томонидан ўрганиш ишлари олиб борилди, дея баёнот билан чиқди Агентлик ахборот хизмати.
Қайд этилишича, видеода акс этган 6 нафар тарбиячи ва 1 нафар ҳамшира эгаллаб турган лавозимидан озод этилди ҳамда улар билан тузилган меҳнат шартномалари қонунчиликда белгиланган тартибда бекор қилинди.
Шунингдек, тарбиячи ходимларнинг фаолияти устидан етарлича назорат ўрнатмаган масъул ходимларга нисбатан интизомий чоралар кўрилди.
Ҳудудий тиббиёт бирлашмаси мутахассислари жалб этилган ҳолда муассасадаги болалар тиббий кўрикдан ўтказилди. Шу билан бирга, «Ғамхўрлик» марказидаги болалар учун мўлжалланган ўйин майдончалари атрофига қўшимча назорат камералари ўрнатилди.
