Президентнинг Сурхондарё вилоятига 2023 йилдаги ташрифи чоғида берилган топшириқлар асосида умумий узунлиги 111 километр бўлган «Дарбанд — Бойсун — Элбаён» автомобиль йўлини қуриш ва таъмирлаш ишлари амалга оширилмоқда, дея хабар бермоқда вилоят ҳокимлиги ахборот хизмати.
Лойиҳанинг 1-лоти доирасидаги 5–32,5 километрлик йўл қисми халқаро пудратчи «Lankaran Yol Tikinti» МЧЖ томонидан тўлиқ қуриб битказилиб, фойдаланишга топширилди.
Лойиҳа доирасида 7 та кўприк, шунингдек, тунги ёритиш тизими билан таъминланган 8 километрлик замонавий пиёдалар йўлаклари барпо этилди.
Шу муносабат билан лойиҳанинг 7,1-километрида жойлашган, узунлиги 60 метр, эни 15,7 метр ва ер сатҳидан баландлиги 9 метр бўлган йўл ўтказгичда тантанали тадбир ўтказилди.
Унда Сурхондарё вилояти ҳокими Улуғбек Қосимов, нуронийлар, фаоллар, мутасаддилар, лойиҳа пудратчилари ҳамда жамоатчилик вакиллари иштирок этди.
Мазкур йўлнинг биринчи босқичи фойдаланишга топширилиши аҳоли ва ҳаракат иштирокчилари учун янада қулай ва хавфсиз транспорт қатновини таъминлашга хизмат қилиши кутилмоқда.
Қуриб битказилган йўл, йўл ўтказгич ва кўприклар, шунингдек, замонавий пиёдалар йўлаклари ҳаракат хавфсизлигини ошириш ва ҳудуднинг транспорт инфратузилмасини янада яхшилашга хизмат қилади.
