Бу ҳақда ibby.org.uk сайти хабар берди.
Мазкур мукофот болалар адабиёти соҳасидаги энг юқори халқаро эътироф бўлиб, у ҳар икки йилда Ёшлар учун китоблар бўйича халқаро кенгаш томонидан ёзувчи ва иллюстраторларга уларнинг умрбод ижодий ютуқлари учун тақдим этилади.
2026 йилги натижаларга кўра, ёзувчилик йўналишида Буюк Британиялик Майкл Розен, иллюстрация йўналишида эса Хитойлик Цай Гао ғолиб деб топилди.
Ҳакамлар таъкидлашича, Майкл Розен болалар билан самимий, ҳазиломуз ва чуқур мазмунли мулоқот ўрната оладиган асарлари билан ажралиб туради. Унинг ижоди болалар адабиётида инсонпарварлик, тарих, оила ва шахсият каби мавзуларни ёритиши билан аҳамиятлидир.
Цай Гао эса ўзининг ноёб визуал услуби, ранглар ва композиция билан ишлаш маҳорати, анъана ва замонавийликни уйғунлаштирган иллюстрациялари билан юқори баҳоланган. Унинг ишлари болаларни тасаввур қилиш ва дунёга бошқача нигоҳ билан қарашга ундайди.
Маълум қилинишича, бу йилги танловда 44 мамлакатдан 78 нафар номзод иштирок этган. Ҳар бир номзоднинг ижоди бадиий ва адабий сифати, инновацион ёндашуви, маданий жиҳатларни акс эттириши ҳамда болалар дунёқарашини бойитиш қобилияти асосида баҳоланган.
Ёшлар учун китоблар бўйича халқаро кенгаш 1953 йилда ташкил этилган бўлиб, у болалар ва китоблар ўртасидаги алоқани мустаҳкамлашга қаратилган халқаро нодавлат ташкилот ҳисобланади.
Мукофот эса болалар адабиёти соҳасидаги энг нуфузли халқаро мукофотлардан бири сифатида эътироф этилади.
