"Чорсу" метро бекати кириш қисмини сув босгач, Тошкент шаҳри ҳокимлиги автотураргоҳлар қурилишида тўсиб қўйилган дренаж тизимини тиклашни бошлади. Ёғингарчилик ҳисобланган миқдордан икки баравар кам бўлишига қарамай, тизим сувни назорат қила олмади. Шаҳар ҳокими воқеа жойига икки марта келиб кетди.
Тошкентдаги «Чорсу» метро бекати кириш қисмини сув босишига 3 май куни ёмғир пайтида ирригация-дренаж тармоқларининг ёпилиши асосий сабаб бўлган. Бу ҳақда пойтахт ҳокимлиги матбуот хизмати ролигида ҳокимлик дренаж ва коллектор тизимлари бошқармаси муҳандиси Фарҳод Нажмиддинов маълум қилди.
"Ўзбошимчалик билан ёпиб қўйишган: автотураргоҳлар, йўлаклар қуришган-у, улар (ирригация тармоқлари) тўсилиб қолган. Илгари бундай муаммо йўқ эди, чунки ирригация тармоқлари нормал ҳолатда эди", — деди мутахассис.
Унинг сўзларига кўра, Тошкентдаги дренаж тизими суткасига 20 мм ёғингарчиликка мўлжалланган бўлиб, якшанба куни икки соат давом этган ёмғирда 12 мм ёғин ёғган. Аммо бу ҳам кўчаларда сув тўпланишига сабаб бўлган.
Фарҳод Нажмиддинов маълум қилишича, бундай ҳолатларнинг олдини олиш мақсадида 36 км ирригация ва дренаж тармоқларини қамраб олган мастер-режа ишлаб чиқилган.
Унинг айтишича, шаҳар ҳокими Шавкат Умурзаков вазиятни ўрганиш учун ҳодиса жойига якшанба ва душанба кунлари борган.
Ҳозирда ёпиб қўйилган дренаж тизимини тозалаш ва янги тармоқларни ётқизиш ишлари олиб борилмоқда.
