Бу Президентнинг 2026 йил 7 июлдаги ПҚ–251-сон «Автомобиль транспортида юк ташувларини амалга оширувчи тадбиркорлик субъектлари фаолиятини қўллаб-қувватлашга қаратилган қўшимча чора-тадбирлар тўғрисида»ги қарорида белгиланди.
Қарорга мувофиқ, 2027 йил 31 декабрга қадар ишлаб чиқарилганига 5 йилдан ошмаган (самосваллар бундан мустасно) қуйидаги транспорт воситалари Ўзбекистонга импорт қилинганда уларга божхона божи ва утилизация йиғимининг нол ставкаси қўлланилади:
- «Евро-5» ва ундан юқори экологик стандартларга жавоб берадиган юк ташишга мўлжалланган автотранспорт воситалари;
- тўлиқ оғирлиги 15 тоннадан ортиқ ёки юкхонасининг ички ҳажми камида 76 куб метр бўлган ярим тиркамалар.
Шу билан бирга, мазкур транспорт воситалари божхона расмийлаштирувидан ўтказилган санадан бошлаб уч йил ичида экспортга сотилса ёки қайта жиҳозлаш натижасида ТИФ ТН коди ўзгарса (ёқилғи турини ўзгартириш билан боғлиқ ҳолатлар бундан мустасно), тақдим этилган имтиёзлар бекор қилинади ва тегишли божхона тўловлари белгиланган тартибда ундирилади.
Қарорга асосан, Европа стандартларига жавоб берадиган мазкур юк автотранспорт воситаларини импорт қилишда уларни мажбурий сертификатлашдан вақтинча озод қилиш бўйича ҳам тегишли ҳукумат қарори қабул қилиниши белгиланган.
