Мурожаатда таълим муассасалари ходимлари зиммасига юкланган масъулият жуда юқори экани таъкидланиб, ҳар бир педагогнинг меҳнати болаларнинг билим олиши билан бирга, уларнинг шахс сифатида шаклланишига бевосита таъсир кўрсатиши қайд этилди.

Вазир болаларнинг ҳуқуқ ва қонуний манфаатларини ҳурмат қилиш, уларнинг руҳий ҳолатига эҳтиёткорлик билан ёндашиш таълим тизими ходимларининг асосий касбий тамойили бўлиши кераклигини урғулади. Шунингдек, ҳар қандай ноўрин хатти-ҳаракат, бепарволик ва лоқайдликка йўл қўймаслик, педагогик этика меъёрларига қатъий риоя этиш зарурлиги таъкидланди.

У ўз мурожаатида нафақат раҳбар, балки она ва буви сифатида ҳам фикр билдириб, ҳар бир бола меҳр ва эътиборга муносиб, қалби нозик ва ишончи беғубор эканини қайд этди. Болалар катталарнинг муносабати орқали ҳаётни англаши, уларга кўрсатилган меҳр ва муносабат келажакда қандай инсон бўлиб етишишига таъсир қилишини таъкидлади.

Шу муносабат билан, таълим муассасаларида соғлом ва инсонпарвар муҳитни таъминлаш, болаларга доимо ҳурмат ва эҳтиром билан муносабатда бўлиш, уларнинг ҳуқуқларини ишончли ҳимоя қилиш талаб этилди.

Мурожаат якунида ҳар бир ходим ўз фаолияти натижалари учун шахсан жавобгар экани, мазкур масалада лоқайдликка мутлақо йўл қўйилмаслиги алоҳида қайд этилди.