Қайд этилганидек, кейинги йилларда мамлакатда суғурта хизматлари ҳамда кредит-молия масалалари бўйича истеъмолчиларнинг ҳуқуқ ва қонуний манфаатларини ҳимоя қилиш, аҳоли, жумладан тадбиркорлар учун қўшимча енгилликлар яратиш борасида кенг кўламли ишлар амалга оширилмоқда.
Шу билан бирга, аҳоли ва тадбиркорларнинг суғуртага оид саводхонлигини ошириш мақсадида оммавий ахборот воситалари орқали кенг қамровли тарғибот ишларини йўлга қўйиш зарурати юзага келмоқда.
Қонун билан суғурта саводхонлигини оширишга қаратилган ахборотни ижтимоий ахборот таркибига киритиш назарда тутилмоқда.
Шунингдек, соҳалардаги ваколатли органлар ҳам ижтимоий ахборот рекламаси берувчилари қаторига киритилмоқда.
Молиявий хизматлар рекламасида эса мазкур хизматлардан фойдаланиш, шунингдек, қарз мажбуриятларини бажармаслик молиявий хатарларни келтириб чиқариши мумкинлиги ҳақида истеъмолчиларни огоҳлантириш талаби белгиланмоқда.
Бундан ташқари, кредит маҳсулотлари рекламасида истеъмолчининг ўз тўлов қобилиятини тўғри баҳолай олмаслиги ва қарз мажбуриятларини бажармаслиги молиявий хатарларни юзага келтириши мумкинлиги ҳақида огоҳлантириш берилиши таъминланади.
Сенаторларнинг таъкидлашича, Қонун аҳолида суғурта хизматларига бўлган ишонч даражасини ошириш, шунингдек, кредит билан боғлиқ молиявий хатарлар ҳақида аҳоли, жумладан тадбиркорларнинг хабардорлигини юксалтиришга хизмат қилади.
Муҳокамалар якунида сенаторлар Қонунни маъқуллади.
