Тўрт томонимиз қуюқ тўқай. Уни катта йўл иккига бўлиб ўтган. Тўқайнинг адоғи кўринармикан дея кафтимизни пешонага қўйиб, олисларга кўз тикамиз. Кунчиқардан кунботар қадар бирор белги, чегара кўринмайди. Кўксимизга ёқимли шабада урилади. Бу шунчаки шабада эмас, янги Ўзбекистон нафасини диёримиз бўйлаб тарқатаётган ҳаётбахш эпкин! Бундан 8-9 йил аввал ҳам биз келган ушбу манзил адоғи кўринмас саҳро бўлганига ишониш қийин. Лекин бу инкор этиб бўлмас ҳақиқат!

Ўшанда мана бу тиниқ осмонни тез-тез чанг қоплар эди. Чунки шамол йўлини тўсадиган бирор тириклик топилмасди. Шу боис, иссиқ кунларда гармсел, ҳаво салқин ташлаганда изғирин забтига оларди. Оролнинг қуриган тубида ҳосил бўлган саҳро қумлари туз аралаш ҳавога кўтарилар эди. Кимсасиз кенгликда эса калтакесак, чўл чумолиси каби саноқли тирик жонни ҳисобга олмаса, ҳаёт аломати сезилмасди.

Биз турган манзилдан 150-200 чақирим наридаги Мўйноқ тумани эса унутилган, қаровсиз ҳудуд эди. Унда умиди сўниб бораётган одамлар зўрға кун кўрар, шу боис, аксарият ёшлар ўзи туғилиб ўсган уйини ташлаб, олис шаҳарларга кетиш орзусида яшарди. Ана шундай бир вазиятда ҳаёт мароми бирдан ўзгарди. Инсонлар қалбига умид, саҳро қумларига яшиллик уруғи сепилди. Яшириб нима қилдик, ўша пайтда бу ниҳоллар унишига шубҳа билан қараганлар ҳам бўлган. Ишончимизга сабаб эса эзгу амал бошида узоқни кўра биладиган, стратегик режа асосида пухта иш олиб борадиган ­мамлакатимиз етакчиси турган эди. Қисқа вақтда ана шу фактор ўз кучини кўрсатиб, амалий ифода топди.

Илк ташрифдан унган гуллар

Қорақалпоқ элида “Қадамингиздан гул унсин” деган эзгу тилак бор. Ҳаёт ҳикмати шундаки, тилак эгасини тўғри топса, албатта, ижобат бўлади. Қорақалпоқ эли доим ­Президентимиз ташрифидан қувониб, шу тилакни такрорлаб юради. Бугун ушбу эзгу ниятнинг ижобатини кўриб турибмиз.

Шавкат Мирзиёев Ўзбекистон Республикаси Президенти сифатида биринчи ташрифини қорақалпоқ заминидан бошлаган эди. Ушбу ташриф қайсидир маънода янги Ўзбекистондаги ислоҳотларнинг амалий қисми бошланганидан далолат берарди. Албатта, ўша пайтда биз ислоҳотларнинг қанчалик кўламдор эканини, қисқа вақтда ҳатто қақроқ саҳрони ҳам яшил майдонга айлантира оладиган даражада ҳаётбахш бўлишини тасаввур қила олганимиз йўқ. Оролнинг қуриган тубига экилган чўл ўсимликларини бориб кўрсангиз, янги Ўзбекистондаги ислоҳотлар ҳақидаги қарашларингиз янада жонланади. Инсон халқини яхши кўриб, сўзи ва амал бирлиги ила ҳаракат қилса, саҳрога ҳам ҳаёт бахш эта олишига амин бўласиз.

Чунки Оролнинг қуриган туби яшил қоплама билан қамраб олиняпти, илк экилган ниҳоллар космосдан кўрина бошлади дея таърифлаш осон. Аммо йиллар давомида унутилган олис манзилга бориб одамларга умид бериш, шўрлаган тупроқда, сувсизликка чидамли бир дона бута ундириш... изиллаган саҳронинг жон олар иссиғи, суяк-суяккача ўтиб кетадиган совуғига чидаб, қалин ўрмонга айлантириш, ҳатто айтишга ҳам осон эмас!

Бунга Қорақалпоғистон, хусусан, Оролнинг қуриган тубига қилган сафаримиз давомида бот-бот амин бўлдик.

Биз — “Янги Ўзбекистон” ва “Правда Востока” газеталари таҳририяти вакиллари Оролнинг қуриган туби сари йўл олдик. Мақсадимиз илк экилган ниҳолларни ўз кўзимиз билан кўриш, Оролбўйи аҳолисининг қувончига сабаб бўлаётган ўзгаришлар билан танишиш эди.

Йўл-йўлакай ён-атрофга қараймиз. Баъзи жойларда қуюқ тўқай, гоҳо ҳар жой-ҳар жойдаги қумтепалар устида икки-учта саксовул унган. Ана шу тепаликларга қарата ҳамроҳимиз, газетамизнинг Қорақалпоғистондаги вакили Минажатдин Қутлимуратов изоҳ ­беради: “Кўрдингизми, саксовуллар қанча қумни “ушлаб” қолган!”.

Ўша томонга диққат билан қараймиз. Саксовул унган тепалик текис жойдан 1-1,5 метр баланд. Тепаликларнинг ҳар бири тонналаб қумдан иборат. Қумтепаларни одам бўйи баробар бўлган икки-уч туп саксовул тутиб турибди. Яшил қоплама энди унган маҳалда бу манзил текис бўлган. Сўнг кўчманчи қум шамол билан кўтарилганида янги унган саксовуллар илдизи қумнинг маълум қисмини сақлаб қолган. Шу сабаб паст-баланд тепаликлар пайдо бўлган экан. Кейин яшил қоплама бўй чўзиб, уруғи сочилиб, ўзидан кўпайган. Туз аралаш қумлар кўчиши кескин камайган. Ана шу манзаранинг ўзиёқ бир туп яшил бутоқ тонналаб туз ва қум аралашмасини ерда сақлаб қолишини исботлайди. Бу Оролнинг қуриган туби учун яшил макон қанчалик аҳамият касб этишидан далолат. Сафаримиздан бир кун аввал кучли бўрон бўлганига қарамай, осмон булоқ суви каби тиниқ эканининг асл сабаби ҳам шу.

Сўз ва амал бирлигидан қувват олиб

Президентимиз Шавкат Мирзиёев Қорақалпоғистонни ҳам ижтимоий, ҳам иқтисодий жиҳатдан тараққий эттириш масалаларини энг устувор вазифалардан этиб белгилаб берган. Айниқса, Мўйноқ ва Оролбўйи ҳудудини ривожлантиришга алоҳида эътибор қаратиб келади.

2017 йил 19 сентябрь куни БМТ Бош ­Ассамблеясининг 72-сессиясида давлатимиз раҳбари Орол муаммосига бутун дунё нигоҳини қаратганди. 2018 йилда эса Оролнинг қуриган қисмида экологик мувозанатни тиклаш, ҳудудда яшил қоплама барпо этиш ҳамда дарахт кўчатларини экиш ташаббуси билан чиққан эди. Ушбу ташаббус билан глобал муаммо саналган Оролнинг қуришига қарши амалий иш бошланди. Ўтган даврда Орол денгизининг қуриган туби ва Оролбўйи ҳудудларидаги 2 миллион гектарда ўрмон-мелиорация ишлари бажарилди. Хусусан, 1,453 миллион гектарга авиация, 462 минг гектарга махсус техникалар ёрдамида чўл ўсимликларининг уруғлари, 85 минг гектар майдонга турли хил кўчатлар экилди. Натижада ҳудуднинг флора ва фаунаси қайта тикланмоқда.

Шу сўзларни ёзяпман-у, кейинги йиллардаги ўзгаришларни ифодалаш учун сўз таърифи камдек. Чунки ҳар бир рақам ортида қанча меҳнат, мамлакат етакчисининг бир сония ҳам тиним билмай изланиши борлигини теран англаб турибмиз. Аммо шунга муносиб сўз, ифода топа олмай жим қоламиз. Ҳа, баъзан сўз қудрати ҳам инсон матонати, меҳнати олдида ожиз қолар экан. Шу онда шоирнинг қуйидаги мисраси ёдга тушади:

Тақдирин қўл билан яратар инсон,

Ғойибдан келажак бахт — бир афсона.

Янги Ўзбекистондаги инсон қадри учун бошланган янгиланишлар бахтни кутиш эмас, уни бугун яратишга қаратилган. Шу боис, халқимиз бугунидан рози, эртасидан кўнгли тўқ бўлиб яшамоқда. Халқни рози қилиш, турли миллат ва элатдан иборат жамиятни ягона Ватан атрофида бирлаштириш ҳақиқий етакчиларгагина хос фазилат.

Мамлакатимиз Лидерининг барча соҳалар каби экологияни асраш борасидаги ташаббуслари ҳам халқаро майдонда чуқур ўрганилмоқда. Бошқа мамлакатлар ушбу тажрибаларни кенг жорий этишга уриняпти. Негаки, улар шунчаки ташаббуслар эмас, йиллар давомида тўпланган тажриба, ҳаётий хулосалар ва илмий изланишлар ҳосиласидир. Энг муҳими, халқимиз олдида фарзандлик бурчини бажаришга бўлган кучли иштиёқ, сўз ва амал бирлигининг ифодаси. Шу боис, янгиланишлар “ислоҳот қилинди” деган ном учун эмас, том маънода халқни рози қилиш йўлидаги саъй-ҳаракатлардир...

Ўшанда экилган ниҳоллар ўрмонга айланибди

Машинамиз тўқайга хос паст-баланд йўлда бир маромда кетиб борар эди. Олдимизда йўл четида тизилиб турган икки-учта машина кўринди. Сўнг очиқ майдонда белкурак олиб, қопда нимадир сочиб юрган одамлар кўзга ташланди. Қизиқиш сабаб уларнинг ёнига тўхтадик. Тасодифни қаранг, улар Оролнинг қуриган тубида иқлим шароити, тупроқ унумдорлигига қараб, дарахт ва бута турларини танлаб экадиган олимлар гуруҳи, соҳа масъуллари экан. Табиийки, мақсади муштарак инсонлар сифатида тезда тил топишдик. Улар суҳбат чоғида жуда қизиқ, муҳим аҳамиятга эга маълумотларни айтиб берди.

— Оролни яшил маконга айлантириш фақат кўчат экиш, уруғ сепишдан иборат эмас, — дейди Қорақалпоғистон Республикаси Ўрмон хўжалиги агентлиги раҳбари Ойбек Аминов. — Ишларни инновацион ва илмий ёндашув асосида ташкил этишга жиддий эътибор беряпмиз. Давлатимиз раҳбари олдимизга мана шундай муҳим вазифа қўйган. Олимлар билан ҳамкорликда уруғларни махсус гранулалаш ва капсулалаш орқали экиш амалиётини синовдан ўтказяпмиз. Капсула деганимиз — зарур минерал ўғитлар йиғиндиси. Илмий асосда неча кило уруғга қайси ўғитдан қанча қўшиш керак экани ишлаб чиқилган. Шунга кўра, минераллар қоришмаси ва уруғлар аралаштирилади ва юмалоқ ҳолатга келтирилади. Капсула намликни яхши сақлайди. Оғирлиги сабаб шамолда учиб кетмайди. Самолётда сепилса ҳам мўлжалланган ерга аниқ тушади. Шу тариқа капсула чўл шароитида ўсимликларнинг унувчанлик даражасини кескин оширади. Ҳозир бошқа жойларга нисбатан тупроғи кўпроқ шўрланган, тузли қум аралаш ерда тажриба учун уруғ қадаяпмиз. Мақсадимиз энг мураккаб шароитда ҳам яшил қоплама яратишда самарадорликка эришиш.

Ойбек Аминовнинг сўзларини тинглар эканмиз, Президентимизнинг ислоҳотларнинг илк кунларидаёқ китобхонлик тарғиботига алоҳида эътибор бергани ёдимизга тушди. Сўнг мамлакатимиз етакчисининг “Маданият Мўйноқдан бошланади” деган сўзини эсладик. Бугун бу сўз замирида катта ҳаётий ҳақиқатларни, улуғвор мақсадлар рўёбини кўриб турибмиз. Оролбўйи ҳудуди кейинги йилларда ҳам ижтимоий, ҳам маданий, ҳам иқтисодий жиҳатдан жадал ривожланиб, аҳоли турмуш даражаси тубдан яхшилангани фикримиз баёнидир.

Бугунги ислоҳотлар китоб, билим ва маърифат билан янада мустаҳкамланиб боряпти. Яшил қопламани яратишдаги илмий изланишлар фикримизнинг яққол мисолидир. Тажриба майдонида олимлар билан суҳбатимиз қизғин кечди. Вақт ҳукмига бўйсуниб, йўлда давом этдик. Энди Қорақалпоғистон Республикаси Ўрмон хўжалиги агентлиги раҳбари Ойбек Аминов бизга ҳамроҳлик қилиб, илк ниҳоллар қадалган манзил сари бошлади.

Очиғи, 2018-2019 йилларда экилган саксовул, юлғун каби ўсимликларни кўриб, ҳақиқий ўрмонга етиб келганимизни англадик. Ўрмон оралаб юлғунларга бўйлаб кўрамиз. Уларнинг аксарияти одам бўйидан анча баланд. Оёғимиз остида эса сон-саноқсиз чиғаноқлар! Қадам босишингиз ҳамон улар ўзига хос овоз чиқариб, қумга чуқур ботади. Ахир бир пайтлар бу ерда денгиз, 50-60 метр чуқурликда сув бўлган.

Катта-кичик кемалар сузиб юрадиган денгиз соҳилида балиқчилик хўжаликлари фаолият олиб борган. Кейин сув тортилди. Бунинг оқибатида глобал иқлим муаммоси юзга келгани ҳақида такрорлашимиз шарт эмас. Ўша пайтларда бу ер саҳрога айланган, тепадан қараган киши бетоблик рамзи бўлган сарғиш рангни кўрар эди. Мамлакатимиз Лидерининг ҳаётбахш ташаббуси сабаб ҳозир бу майдон яшил тусда кўзга яққол ташланади. Сафар чоғида шунга амин бўлдикки, кейинги йилларда амалга оширилган ишлар экологик муаммони юмшатиш ва унга қарши курашишда катта самара бермоқда. Бу ерда янги экотизим яралиб, ҳайвонот дунёси пайдо бўляпти. Сафар чоғида тулки ва қуёнларнинг югуриб юрганини кўрдик. Қаердандир сайроқи қушнинг хониши эшитилади. Ҳатто бу ерда кийиклар ҳам бор экан. Мутахассислар, хусусан, Ўзбекистон Фанлар академияси вакилларининг таъкидлашича, ҳудудда яшиллик пайдо бўлгач, қум ва туз бўронлари 50 фоизгача камайган. Бу жуда катта натижа. Масалан, қўшни мамлакатларда бундай бўронлар ҳалигача тез-тез кузатилади. Яқинда ҳам улар ана шундай бўронларнинг бирини бошдан кечирди.

— Ҳозир Оролнинг суви қуриган ўзанида турибмиз, — дейди Мўйноқ давлат ўрмон хўжалиги раҳбари Алишер Бекмуродов. — Бу ерларда 2018 йилдан янги ҳаёт бошланди деб бемалол айта оламиз. Ҳудудга чўл шароитига чидамли ўсимлик турлари экилди. Бута ва ўсимликлар пайдо бўлиши билан шу ердаги ёввойи ҳайвонот дунёси учун ҳам янги ҳаёт бошланди.

Бундан ташқари, Президентимиз ташаббуси билан беш-олти жойда тик қудуқлар қазилди. Ҳайвонлар, қушлар, ўсимликлар — ҳаммаси шу ердан сув ичади. Айтиш мумкинки, ҳудудда ҳаёт янги босқичга ўтди. Яхшилаб кузатсангиз, юлғун ва саксовуллар орасида озиқланиб юрган қуён ва бошқа турли ҳайвонларни учратасиз. Ҳозир уларнинг кўпайиш даври.

Биласизми, бу жойлар яқин йилларга қадар бош-адоғи йўқ оппоқ қум эди. Шамол қумни у ёқдан-бу ёққа кўчириб, улкан барханлар пайдо қиларди. Илгари мана шу чўлларда яна ўсимликлар ўсади, ҳайвонлар қайтиб келади деса, биров ишонмасди. Мана, ҳозир кўз ўнгимизда бу реалликка айланди. Устига-устак, мазкур ҳудудда ов қилиш қатъиян тақиқланган. Шу сабаб ҳайвонлар популяцияси жуда яхши. Ҳаммаси шундай давом этса, беш-ўн йилдан кейин бу ер улкан қўриқхонага айланиб кетиши ҳеч гапмас.

Мутахассислар таъкидлашича, кейинчалик бу ерда фақат чўлга чидамли буталар эмас, бошқа ўсимлик турларини ҳам экиб, катта яйловга айлантирса бўлар экан. Шу орқали чорвачилик, асаларичилик каби бошқа тармоқларни ривожлантириш имкони бор. Масалан, юлғун май ойининг бошида гуллайди. Мазкур ҳудудда янтоқ ҳам кўп экан. Демак, асал олиш учун етарли шароит мавжуд. Бу иқтисодий барқарорликни мустаҳкамлаш учун яхши имконият. Қаранг, узоқни кўзлаб, пухта режа асосида бажарилган ишнинг самараси ва кўлами қанчалик кенг!

Бу йил қиш ва баҳор баракали келди. Бундай пайтда ерда намлик яхши бўлади. Ана шундай ғанимат фурсатдан унумли фойдаланиш ҳар қачонгидан ҳам муҳим.

— Ердаги намлик яхши экани боис, жорий йилда яна 230 минг гектар майдонга уруғ қадалди, — дейди Ойбек Аминов. — Жараёнда 700 дан зиёд махсус техника ва механизмлардан, шунингдек, бориш қийин бўлган ҳудудларга уруғ сочиш учун иккита самолётдан унумли фойдаланилди. Намликни сақлаш ҳамда кўчиб юрувчи қумларни тўхтатиш мақсадида ўзига хос агротехник усуллар қўлланилиб, махсус жўяклар тортилди. Бу жойларга асосан шўр ҳамда қурғоқчиликка чидамли бўлган қорабароқ, юлғун, сарсазан, қандим, черкез ҳамда изен каби ўсимликлар экилмоқда. Олдимизда турган асосий стратегик мақсадлардан бири — 2030 йилга қадар мазкур ҳудудда яна 1 миллион гектардан зиёд майдонда яшил қопламаларни барпо этишдир. Бу борада махсус саксовул кўчатхоналарининг фаолияти тобора кенгайтирилмоқда.

Барака ва унумдорлик сири шукроналикда, мардликда

Мўйноқ мамлакатимизнинг энг шимолий ҳудуди. Ундаги ҳаёт мароми, юрак уриши Орол денгизи билан чамбарчас боғлиқ. Шу боис, Оролнинг қуриган тубидаги яшиллик бўй чўзишига ҳамоҳанг равишда мўйноқликлар қалбида ҳам умид, ишонч мустаҳкамланди. Аниқ рақамларга эътибор берсак. Ўтган 2025 йилда туманда саноат маҳсулотлари ишлаб чиқариш ҳажми 621,1 миллиард сўмни ташкил этган. Ўсиш суръати 121,4 фоизга етиб, республикадаги улуши 2,1 фоизни ташкил қилган.

Илгари мўйноқликлар оғир турмуш шароитида яшаган. Одамлар ҳатто кундалик эҳтиёжларини қондиришда қийналган, болалар учун мактаб формаси ва ўқув қуролларини сотиб олишга ҳам имкони бўлмаган. Ёши улуғ инсонлардан бири бу ҳақда сўзлаб, кўз ёши билан ўтмишни эслади. Эски сандиқларда сақланган кийимлардан фойдаланишга, ёзув қуролларини қайта-қайта ишлатишга мажбур бўлганликларини айтди. Ана шундай оғир вазиятда қолган туман аҳли бугун экспорт, инвестиция лойиҳалари ҳақида баҳс юритиб, уни яна қай йўсин кўпайтириш борасида фикр алмашяпти. Биргина мисол, 2025 йилда Мўйноқда жами 172 миллиард сўмлик 10 та инвестиция лойиҳаси амалга оширилган. Натижада 195 та янги иш ўрни яратилган. Яна бир муҳим факт. Ўтган йил давомида хорижий инвестициялар ва кредит маблағлари ҳисобидан жами 5,1 миллион долларлик инвестициялар ўзлаштирилган. Бажарилган ишлар натижасида камбағаллик даражаси 5,5 фоиздан 2,7 фоизга туширилган.

Агар қиёслаш жоиз бўлса, бундан 10 йил аввал туман иқтисоди Оролнинг қуриган туби каби “саҳро”га айланганди. Бугун у қайтадан жонланмоқда. Шунга муносиб тарзда аҳолининг яшаш шароити йил сайин яхшиланиб боряпти. Қанчалик мураккаб бўлмасин, Мўйноқнинг мард ва танти аҳолиси синовлардан мардона ўта олди.

Давлатимиз раҳбари 2018 йилда Мўйноқ туманига ташрифи чоғида: “Орол фожиасидан энг кўп зарар кўрган асли шу — Мўйноқ аҳолиси. Уларнинг сабр-қаноати, ватанпарварлиги, меҳнаткашлиги учун раҳмат айтишимиз, шунга муносиб хизмат қилишимиз керак”, деган эди.

Сафар чоғида Мўйноққа бориб, сўнгги йилларда амалга оширилган ислоҳотлар билан танишар эканмиз, мамлакатимиз етакчисининг илк ташрифи чоғида айтган фикрлари ҳаётда ўз аксини топганига кўп бора гувоҳ бўлдик. Мард ва танти мўйноқликлар билан суҳбатлашдик, уларнинг кўзларида кечаги дард ва бугунги умидни кўрдик. Орол денгизи қуриши натижасида ҳавога кўтарилган туз ва чанг нафақат табиатни, балки инсон саломатлигини ҳам издан чиқарган эди. Оқибатда онкологик ва бошқа оғир касалликлар кўпайиб, аҳоли орасида хавотир ва тушкунлик кайфияти ҳукм сура бошлаган.

Сўнгги йиллардаги кенг кўламли ислоҳотлар Мўйноқ аҳлига умид ва ишонч берди. Давлатимиз раҳбари ташаббуси билан Орол тубида яшил қопламалар барпо этилиши, туман инфратузилмасининг янгиланиши, ижтимоий соҳадаги ислоҳотлар ҳудуд ҳаётини тубдан ўзгартирди. Маҳаллий аҳоли таъбири билан айтганда, “ҳаёт бу ерда қайта туғилди”.

Тантиликни қарангки, туман аҳли ушбу имкониятларга шукрона айтиб, ҳалол меҳнат ила рўзғор тебратмоқда. Сафаримиз давомида Мўйноқ тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Мурод Жумабоев жуда қизиқ фактни айтди.

Оролбўйи аҳолисининг ижтимоий шароитини яхшилаш, доимий даромад манбаларини яратиш борасида ҳам қатор амалий ишлар олиб бориляпти экан. Хусусан, Орол денгизида сақланиб қолган ягона ноёб жонивор — артемия цистаси саноатини ривожлантириш мақсадида махсус давлат унитар корхонаси ташкил этилган. Бугун маҳаллий аҳоли ушбу қимматбаҳо уруғни йиғиб топшириш орқали ўзлари учун қўшимча даромад ­топяпти.

Артемия цистаси маълум мавсумда денгизда сузиб, қирғоқ сари оқиб келади. Соҳилда уларни тутиш илинжида мўйноқликлар қатор тизилади. Ҳамма белгиланган жойида туради. Ҳеч ким бошқалар чегарасини бузиб ўтмайди. Артемия цистаси кимнинг рўпарасига оқиб келса, ўша киши унга эгалик қилади. Бошқалар эса жим қараб тураверади. Тасаввур қиляпсизми, рўпарангизда килоси фалон сўм турадиган маҳсулот оқиб келяпти. Аммо у кимдир чизган чизиқдан бир қадам нарида экани боис, эгалик қила олмайсиз. Кун давомида бу ҳолат ўн, юз марта такрорланса ҳам денгиз тортиқ этган насибага рози бўлиб уйга қайтасиз. Оҳ, бу мардлик, тантиликни қанчалик таърифламанг, сўз етмайди!

Жамоамиз бир-бирига маъноли қарайди. Ҳар ким ўзича бундан ҳикмат излайди. Ана шу ҳикматнинг барчаси битта ўқилдизга бирлашади, назаримда. Бу — мардлик, берилган ризққа шукроналик ҳисси. Мўйноқнинг баракаси, бошланган ишларнинг тез ривож топиб, шўрлаган саҳросида ҳам яшиллик униб кетаверишининг сирларидан бири шунда бўлса, не ажаб?!

Сафардан кейинги ўйлар

Баъзан узоқ сафарлар кишига йиллар давомида шаклланган қарашларни янгилайдиган теран хулосаларни ҳадя этади. Сафаримиз якунланиб, ортга қайтар эканмиз, яна кўкка кўз тикамиз. Осмон булоқ сувидан ҳам тиниқроқ кўринади. Негадир “Осмон — ойина” деган ибора фикр-ёдимни банд этади. У вақти-вақти билан бизга ўзимиз бажарган ишлар, асл қиёфамизни кўрсатиб туради. Шундай ўйлар оғушида кетар эканмиз, ундаги оппоқ булутлар кўзимизга қирғоққа урилаётган денгиз тўлқинини эслатади. Мовий кенглик эса сокин чайқалаётган денгизни ёдга солади. Буларнинг барчаси жам бўлиб янги Ўзбекистондаги ислоҳотларнинг осмон ойинасидаги тасвиридай таассурот уйғотади. Аслида ҳам шундай, назаримда.

Тошкентга қайтганимизда эса Президентимиз Минтақавий экологик саммит ва Оролни қутқариш халқаро жамғармаси таъсисчи давлатлари раҳбарлари кенгашининг йиғилишида иштирок этиш учун Қозоғистонга амалий ташриф билан бориши ҳақидаги хабарлар тарқала бошлади. Ана шу хабарларга пайваста ҳолатда дилда бир эзгу тилак туғилди: Оролнинг мовий осмони бутун дунёга ёйилиб, экологик масалалар барҳам топсин. Инсонлар қалби ҳам ана шундай тиниқлашиб, кўнгилларга умид ва ишонч бағишлаётган, ҳаётимизни тубдан ўзгартириб, инсон қадри учун қилинаётган эзгу ва тарихий бебаҳо саъй-ҳаракатлар доимо бардавом бўлсин!

Салим Дониёров,

Ўзбекистон Республикасида хизмат кўрсатган журналист