Бу даврда талабаларни янги ўқув йилига муносиб кутиб олиш, уларни талабалар турар жойлари билан таъминлаш ва юзага келиши мумкин бўлган муаммоларни тезкор бартараф этишга алоҳида эътибор қаратилади.
Бу Олий таълим, фан ва инновациялар вазирининг 2026 йил 21 августдаги 356-сон буйруғи билан белгиланди.
Янги 2026/2027 ўқув йили 1-босқич талабалари учун 7 сентябрдан, 2-босқич ва ундан юқори курслар учун эса 14 сентябрдан бошланади.
«Долзарб қирқ кунлик» доирасида олий таълим ташкилотларига ўқув бинолари ва талабалар турар жойларини янги ўқув йилига тайёрлаш, талабаларни турар жой билан таъминлаш, профессор-ўқитувчилар таркибини шакллантириш ҳамда ўқув-услубий ҳужжатлар билан таъминлаш бўйича вазифалар юклатилган.
Талабаликка тавсия этилган абитуриентларга тўлов-контракт маблағларини шартномада белгиланган миқдор ва муддатларда тўлагунга қадар фармойиш асосида ўқув машғулотларида қатнашишга рухсат берилади.
Биринчи босқич талабалари учун янги ўқув йили доирасида тантанали кутиб олиш маросимлари, «Кредит таълими тизимига кириш» ҳафталиги ва «Талабаликка бағишлов» тадбирларини ташкил этиш белгиланган.
Шунингдек, сентябрь ойида таълим ташкилотларида «Ягона ватан, ягона халқ бўлиб, янги ҳаёт ва келажак яратайлик!» шиори остида «Мустақиллик дарслари» ўтказилади.
Уларда жадидлик ҳаракати намояндалари ва қатағон қурбонларига бағишланган машғулотлар, маънавий-маърифий тадбирлар, давра суҳбатлари, уч авлод учрашувлари, викторина ва кўрик-танловлар ҳамда спорт мусобақалари ташкил этилади.
Шу тариқа, «Долзарб қирқ кунлик» даврида олий таълим ташкилотларида янги ўқув йилини сифатли ташкил этиш, талабалар учун зарур шароитларни яратиш ва таълим жараёнини самарали бошлашга қаратилган ишлар амалга оширилади.
