15 август куни Омскдаги Драверт кварталлари микрорайонида қурилиш майдонида ёнғин содир бўлган. Ёнғинни ўчиришга 30 нафар қутқарувчи ва олти бирлик махсус техника жалб этилган.
Ҳодиса жойидан 11 нафар киши шифохонага олиб кетилган, улардан уч нафари кейинчалик уйига жавоб берилган. Бир нафар жабрланувчи вафот этган. Жабрланганларнинг барчаси пудратчи ташкилот ишчилари бўлган.
Россиядаги Ўзбекистон Ташқи ишлар вазирлиги маълумотига кўра, жабрланганлар орасида Ўзбекистоннинг икки нафар фуқароси ҳам бор.
Дастлабки маълумотларга кўра, ёнғин пайвандлаш ишлари вақтида иссиқлик изоляцияси материалининг ёниб кетиши оқибатида келиб чиққан.
Ҳодиса юзасидан Россия Жиноят кодексининг меҳнатни муҳофаза қилиш талабларини бузиш ва эҳтиётсизлик орқали инсон ўлимига сабаб бўлишни назарда тутувчи 143-моддаси билан жиноят иши қўзғатилган. Вилоят прокуратураси томонидан ҳодиса юзасидан текширув ташкил этилган.
