Давлат раҳбари Европа тикланиш ва тараққиёт банки президенти Одиль Рено-Бассога Ўзбекистондаги ислоҳотларни қўллаб-қувватлаб келаётгани учун миннатдорлик билдирди. Шунингдек, йиғилишда иштирок этаётган халқаро ташкилотлар ва хорижий компаниялар раҳбарларини қутлади.
Таъкидланганидек, сўнгги йилларда Хорижий инвесторлар кенгаши Янги Ўзбекистон билан жаҳон инвестиция ҳамжамияти ўртасидаги ишончли мулоқот майдонига айланди. Бир йил ичида кенгаш аъзолари сони 54 тадан 85 тага етди. Улар иқтисодиётнинг 23 та тармоғини қамраб олган.
Президент ўтган йилги йиғилишда илгари сурилган 21 та ташаббус бўйича аниқ қарорлар қабул қилинганини таъкидлади.
— Инвесторларнинг ташаббуслари давлат сиёсатида ўзининг амалий ифодасини топмоқда. Таклифларнинг салмоқли қисми асосида норматив-ҳуқуқий ҳужжатлар такомиллаштирилди, — деди давлат раҳбари.
Хусусан, Солиқ кодексига инвесторлар учун қулай ўзгартишлар киритилди, компаниялар ўртасидаги ички қарз битимлари молиявий назоратдан чиқарилди, асосий воситаларни жадаллаштирилган тартибда амортизация қилиш ҳуқуқи берилди. Халқаро стандартлар асосида ҳисобот юритувчи хорижий компаниялар учун бир қатор мажбурий талаблар ҳам бекор қилинди.
Шунингдек, «Муқобил инвестиция жамғармалари тўғрисида»ги қонун лойиҳаси ишлаб чиқилди, масъулиятли бизнес юритиш стандартларини жорий этиш ва 16 та техник регламентни халқаро меъёрларга мувофиқлаштириш дастури тайёрланди.
Президент хорижий инвесторлар учун тенг ва адолатли шарт-шароитлар яратиш бўйича халқаро мажбуриятларни қабул қилиш юзасидан ҳам янги қадамлар ташланаётганини қайд этди.
