Маълум бўлишича, Тошкент шаҳри, Самарқанд, Бухоро, Андижон ва Фарғона вилоятларида яшовчи 1987–1998 йилларда туғилган саккиз нафар фуқаро интернет орқали тарқатилган мурожаатларга ишониб, Абдулмуҳсин Усмонов номига расмийлаштирилган ҳисоб рақамларига пул маблағлари ўтказиб келган.
Тергов материалларига кўра, 1996 йилда туғилган Қирғизистон фуқароси Абдулмуҳсин Абдувоҳидович Усмонов Сурияда фаолият юритувчи террорчилик тузилмаси билан боғлиқ бўлиб, терроризмга оид жиноятларда айбланиб халқаро қидирувга берилган. У «Саад Мухтор» тахаллуси билан Telegram орқали Фаластинда жабр кўрган мусулмонларга ёрдам бериш баҳонасида хайрия маблағларини йиғган.
Аниқланишича, тўпланган маблағлар муҳтож аҳолига эмас, балки Суриядаги жангариларнинг эҳтиёжлари учун сарфланган.
Мазкур ҳолат юзасидан жиноят иши қўзғатилиб, суд томонидан айбдор деб топилган етти нафар шахсга 3 йилдан 8 йилгача озодликдан маҳрум қилиш жазоси тайинланди. Яна бир нафар шахсга эса 4 йил 4 ой муддатга озодликни чеклаш жазоси берилди.
Давлат хавфсизлик хизмати фуқароларни ижтимоий тармоқлардаги шубҳали хайрия чақириқларига ишонмасликка чақириб, маблағ ўтказишдан аввал унинг мақсади ва манбасини синчиклаб текшириш зарурлигини эслатди.
Эслатиб ўтамиз, Ўзбекистон Республикаси Жиноят кодексининг терроризмни молиялаштиришга оид моддаларига мувофиқ, бундай жиноятлар учун 15 йилгача озодликдан маҳрум қилиш жазоси белгиланган.
