Байрам тадбирлари халқимиз бирдамлигини, тинчлик ва мустақиллик қадрини улуғлаш, миллий қадриятларимиз ҳамда бой маънавий меросимизни тарғиб этишга хизмат қилмоқда. Республика Маънавият ва маърифат маркази, Ўзбекистон маҳаллалари уюшмаси ҳамда “Маърифат” тарғиботчилар жамияти ҳамкорлигида ташкил этилган фестивалнинг навбатдаги манзили Сурхондарё вилояти бўлди.

“Маърифат” тарғиботчилари сафида ушбу тадбирларда иштирок этар эканмиз, Сурхон элининг меҳмондўстлигига, шунингдек, юртдошларимиз қалбидаги Ватанга садоқат ва дахлдорлик туйғусига бевосита гувоҳ бўлдик. Ҳар бир учрашув, ҳар бир суҳбат бу диёр одамларининг руҳи нақадар бақувват эканини яна бир бор кўрсатди.

Давлатимиз раҳбарининг 2026 йил 1 апрелдаги “Ўзбекистон Республикаси давлат мустақиллигининг 35 йиллигини кенг нишонлашга тайёргарлик кўриш ва уни ўтказиш тўғрисида”ги қарори ижросини таъминлаш доирасида ташкил этилган фестиваль май-сентябрь ойлари давомида 208 та туман ва шаҳар марказларида, “Янги Ўзбекистон” массивларида ҳамда 8902 та маҳаллада давом этмоқда. Сурхондарё вилоятида эса фестиваль тадбирлари 5-7 август кунлари ўтказилди.

Тадбирлар “Мустақиллик марафони” билан бошланди. Бу юриш масофани эмас, балки мақсад бирлигини кўрсатади. ­Сариосиё туманидаги аэропортдан то Алишер Навоий номидаги маҳалла фуқаролар йиғини аркасига қадар давом этган тантанали юришда зиёлилар, ҳарбийлар, ёшлар, спортчилар ва маҳалла фаоллари иштирок этди.

Бугунги ёшлар интернет орқали дунёни кўрмоқда. Аммо Ватанни ҳимоя қилиш масъ­улиятини фақат ҳаётнинг ўзи ўргата олади. Шу боис, фестиваль дастуридан ўрин олган “Шижоат” лойиҳаси Сариосиё ва ­Денов туманларидаги ҳарбий қисмларда ташкил этилди ҳамда унда ҳарбий хизматчилар ва оила аъзолари фаол иштирок этди.

Тарихни буюк инсонлар яратади. Келажакни эса уларнинг изидан борадиган ёшлар барпо этади. “Миллат фидойилари” лойиҳаси ана шундай инсонларнинг ҳаёт йўли, меҳнати ва Ватан равнақи йўлидаги хизматларини ёш авлодга етказишни мақсад қилган. Лойиҳа доирасида фестиваль иштирокчилари Узун туманида кўп йиллар таълим соҳасида фидокорона меҳнат қилган устозлар ҳолидан хабар олди. Оқсоқоллар ёш авлодга оқ фотиҳа бериб, юртимиз тинч, осмонимиз мусаффо, фарзандларимиз илмли ва ватанпарвар бўлиб камол топишини тилаб, дуо қилди.

Тумандаги Шабнам маҳалласининг ўзида 4 профессор олим, 120 педагог ва 20 дан ортиқ шифокор истиқомат қилади. Улар аҳоли билан бирга маҳалла ёшларига ҳам устоз, ҳам намуна вазифасини ўтаб, янги авлодни тарбиялашда фидойилик кўрсатмоқда. Маҳалла обод. Замонавий, кўп қаватли уйлар ва меҳмонхоналар барпо этилгани Сурхон воҳасидаги янги ­бунёдкорлик ҳамда халқ фаровонлигининг амалий ифодасидир.

Ёш авлод билан учрашув фестиваль марказий ғояларидан бири бўлди. Узун туманидаги “Жануб гавҳари” ­соғломлаштириш оромгоҳида ўтказилган “Янги Ўзбекистоннинг бахтиёр болалари” лойиҳаси ўғил-қизларга дам олиш билан бирга илҳом, қувонч ва ижодга рағбат улашди.

Сунъий интеллект асрида билимга эҳтиёж янада ортмоқда. Ахборотни интернет беради, аммо тафаккурни китоб шакл­лантиради. Маънавият тарғиботчилари Сариосиё туманидаги Лутфкор маҳалласида жойлашган кутубхона фаолияти билан танишди. Бу масканда кечган мулоқотларда китобнинг инсон ҳаётидаги ўрни, илм ва маърифатнинг жамият тараққиётидаги аҳамияти асосий мавзу бўлди. “Маърифат” тарғиботчилар жамияти аъзоси Шаҳло Аҳророва китоб инсон маънавиятининг таянчи, ёшларни мутолаага ундаш бугуннинг энг муҳим вазифаларидан экани ҳақида сўз юритди.

Зиёратгоҳлар нафақат тарихий ва муқаддас хотира, балки инсон қалбини эзгулик, маънавий юксалиш ҳамда чуқур тафаккурга етаклайдиган тарбия масканидир. Фестиваль доирасидаги ўзига хос “Зиёрат одоби” лойиҳаси табаррук мас­канларнинг озодалигига ҳисса қўшиш, зиёратгоҳ муҳити ва бошқа зиёратчилар билан маданий муносабатда бўлиш ҳар бир фуқаронинг маънавий масъулияти эканини эслатади. Лойиҳа доирасида тарғиботчилар аввал Сариосиё туманидаги “Деҳқаландар” қабристонида, сўнг Шеробод туманидаги Имом Абу Исо Муҳаммад Термизий зиёратгоҳида бўлди. Иштирокчиларга “Зиёрат одоби” номли махсус қўлланма тарқатилди. ­Шунингдек, “Маърифат тур” лойиҳаси доирасида диққатга сазовор масканларга саёҳатлар уюштирилди.

Обод ва аҳил маҳалла фаровон жамиятнинг мустаҳкам пойдевори. У — меҳр-оқибат, ўзаро ҳурмат, бирдамлик ва ҳамжиҳатлик қарор топадиган ҳаёт мактабидир. Шу боис, “Обод хонадон — обод маҳалла” лойиҳаси нафақат ҳудудларни ободонлаштириш, балки одамларда дахлдорлик туйғусини кучайтириш ва фуқароларнинг ўз яшаш маскани ободлиги учун масъулиятини оширишга хизмат қилмоқда. Узун туманидаги Янги рўзғор маҳалласида кечган маънавий мулоқотлар айни мулоҳазалар атрофида бўлди. Маҳалла фаоллари ободонлаштириш ишлари одамларни яқинлаштиргани, қўни-қўшничилик ришталарини мустаҳкамлагани ҳамда фуқароларда ўз маҳалласига нисбатан масъулият туйғусини оширганини мамнуният билан қайд этди. Бу маҳаллада фарғоналиклар томонидан узумзорлар барпо этилган бўлиб, маҳалла йўлакларида турли узумлар пишиб, атрофга ўзгача чирой бағишламоқда. Ҳар бир хонадон аҳли узумчилик ортидан даромади яхшиланганини ҳамда қўшни давлатларга экспорт йўлга қўйилганини таъкидлар экан, уларнинг кўзида қувонч, эртанги кунга ишонч балқиб турарди.

Фестивалнинг биринчи куни якунида Денов туманидаги ҳарбий қисмда галаконцерт бўлиб ўтди. Тадбирда олимлар, адиблар, шоирлар, санъат намояндалари, “Маърифат” тарғиботчилари, ҳарбий хизматчилар ва кенг жамоатчилик вакиллари иштирок этди. Байрам давомида ­Ватанга муҳаббат, тинчлик ва бирдамликни улуғловчи куй-қўшиқлар, бадиий чиқиш­лар ҳамда миллий санъат намуналари намойиш этилиб, йиғилганларга кўтаринки кайфият улашилди.

Иккинчи куни Жарқўрғон туманидаги ҳарбий қисм маданият марказида “Умуммиллий бирдамлик” лойиҳаси ўтказилди. У турли миллат ва элат вакиллари ўртасида ўзаро ҳурмат, бағрикенглик ва ­ижтимоий ҳамкорлик муҳитини мустаҳкамлашга хизмат қилди.

“ЭтноСурхон” фольклор ва миллий ­ўйинлар фестивали воҳадаги тадбирларнинг кўтаринки намойиши бўлди. Бойсун туманидаги Бибиширин маҳалласида жойлашган “Бойсун баҳори” туризм мажмуаси амфитеатрида вилоятнинг 15 тумани ва шаҳридан келган фольклор-этнографик дасталарнинг чиқиши, бахшичилик санъати танлови ҳамда миллий халқ ўйинлари ташкил қилинди. Ушбу тадбир Сурхоннинг чинакам руҳиятини намоён этди. Кечки галаконцерт ҳам “Ягона Ватан, ягона халқ бўлиб, янги ҳаёт ва келажак яратамиз!” шиори остида мазкур мажмуада давом этди.

Учинчи куни Термиз шаҳрида “Маҳалла — маънавий макон” мавзусида семинар-тренинг бўлиб ўтди. Ангор туманида эса “Яхшилик карвони” лойиҳаси доирасида кексалар, нуронийлар ва ижтимоий ёрдамга муҳтож оилалар ҳолидан хабар олинди.

Фестивалнинг “Шукроналик” лойиҳаси инсоний қадриятлар ва меҳр-оқибатнинг ёрқин ифодасига айланди. Лойиҳа доирасида бир гуруҳ санъат намояндалари Ангор туманининг Таллимарон маҳалласида истиқомат қилувчи, муборак 101 ёшни қаршилаган Марзия момо Ҳамроева хонадонида бўлди. Онахоннинг ҳолидан хабар олинди. У билан самимий суҳбат қурилди. Ватан ва тинчликни мадҳ этувчи куй-қўшиқлар ижро этилиб, момога эсдалик совғалар топширилди. Мазкур ташриф нуронийларга эҳтиром кўрсатиш, уларнинг жамиятдаги муносиб ўрни ва хизматларини эътироф этиш, халқимизнинг меҳр-оқибат ҳамда шукроналик қадриятларини кенг тарғиб этишга хизмат қилди.

Ўнлаб олис манзиллар, ўндан ортиқ ижтимоий лойиҳалар, минглаб иштирокчилар... Буларнинг барчасини бирлаштириб турган ягона ғоя бор: “Ягона Ватан, ягона халқ бўлиб, янги ҳаёт ва келажак яратамиз!”. Мустақиллик — фақат бир кун нишонланадиган сана эмас. У ҳар куни меҳнат, бирдамлик, маърифат ва ватанпарварлик билан мустаҳкамланадиган бебаҳо қадриятдир. Сурхондарёда бўлиб ўтган “Мустақиллик тўйи” фестивали ана шу ҳақиқатни яна бир бор намоён этди.

Феруза МУҲИДДИНОВА,

“Маърифат” тарғиботчилар жамияти аъзоси