Маълум қилинишича, мазкур шахс Интерпол каналлари орқали ўта йирик миқдордаги фирибгарлик жиноятини содир этганликда гумон қилиниб, қидирувга берилган. Унинг жойлашган манзилини аниқлаш ва қўлга олиш мақсадида хорижий давлатлар Миллий марказий бюролари билан доимий ахборот алмашинуви ва ҳаракатлар мувофиқлаштирилди.
Хусусан, Интерполнинг Тбилиси шаҳридаги Миллий марказий бюроси билан ўтказилган ҳамкорликдаги тадбирлар натижасида қидирувдаги шахс Грузия ҳудудида аниқланиб, қўлга олинган.
Қайд этилишича, халқаро қидирув эълон қилишдан тортиб, экстрадиция жараёнини амалга оширишгача бўлган барча босқичларда Интерполнинг Ўзбекистондаги Миллий марказий бюроси томонидан ташкилий-ҳуқуқий ва ахборот жиҳатдан тўлиқ ҳамроҳлик қилинган.
Шунингдек, Грузия Адлия вазирлиги Ўзбекистон томонидан киритилган илтимосномани қаноатлантирганидан сўнг, экстрадиция қилинган шахс Ўзбекистон Республикаси Бош прокуратураси ташаббуси асосида Тошкент шаҳрига олиб келинди.
Ҳозирда у Ўзбекистон Республикаси қонунчилигига мувофиқ жавобгарликка тортилади.
