Юқори малакали шифокорлар тайёрлаш йўлга қўйилиб, улар учун муносиб шароитлар яратилди. Илгари хорижда амалга оширилган 100 дан зиёд мураккаб диагностика ва даволаш усуллари бугун юртимизда ҳам мукаммал бажарилмоқда.
– Аҳолининг ўртача умр кўриш давомийлиги 1991 йилдаги 66,4 ёшдан 2025 йилда 75,4 ёшга етгани, гўдаклар ва оналар ўлими кўрсаткичи 4 баробар камайгани соҳадаги ислоҳотларимизнинг энг муҳим натижасидир,
– деди Президентимиз.
Давлатимиз раҳбари жонажон Ватанимиз азалдан улуғ мутафаккирлар, азиз авлиёлар ва буюк алломалар юрти бўлиб келганини таъкидлади.
Бу бебаҳо меросга муносиб равишда Ислом цивилизацияси маркази, Имом Бухорий ва Бурҳониддин Марғиноний ёдгорлик мажмуалари каби бетакрор илмий-маърифий даргоҳлар барпо этилди.
Ушбу муҳташам ва табаррук масканлар нафақат юртимиз ва ислом олами, балки бутун жаҳон аҳлининг ҳақли эътирофига сазовор бўлмоқда. Бундай бунёдкорлик ишлари жадал давом эттирилади.
