Ўрганишлар Вазирлар Маҳкамасининг 722-сон қарори ҳамда Соғлиқни сақлаш вазирлигининг 150-сон буйруғи талаблари асосида амалга оширилди. Жумладан, Қорақалпоғистон Республикаси ва ихтисослаштирилган тиббиёт марказлари ҳамда Тахиатош тумани тиббиёт бирлашмасида пуллик тиббий хизматлар нархларининг шакллантирилиши ва қўлланилиши таҳлил қилинди.
Таҳлиллар давомида нархлар ошишига таъсир кўрсатган қатор омиллар аниқланди. Хусусан, тушумларнинг 2 фоизини рағбатлантириш жамғармасига ажратиш, амортизация харажатларини ҳисобга олиш, рентабелликнинг энг юқори миқдорини қўллаш, хронометраж меъёрларини белгиланган тартибда келишмасдан тасдиқлаш ҳамда айрим солиқ харажатларини ҳисоб-китобга киритиш ҳолатлари қайд этилди.
Аниқланган қонунбузилишлар юзасидан 6 та тиббиёт муассасасига нисбатан иш қўзғатилди. Шунингдек, қонунчилик талаблари бузилишини бартараф этиш, келгусида бундай ҳолатларга йўл қўймаслик ҳамда истеъмолчилардан асоссиз ундирилган 285,4 млн сўм маблағни 127 мингдан ортиқ фуқарога қайтариш бўйича кўрсатмалар берилди.
Қўмита томонидан кўрилган чоралар натижасида пуллик тиббий хизматлар нархларини сунъий оширувчи омиллар бартараф этилди. Натижада аҳоли учун пуллик тиббий хизматлар нархларининг ўртача 5–10 фоизга арзонлашиши таъминланди.
