BRT йўлагида катта сиғимли ва оғир автобуслар мунтазам ҳаракатланади. Шу сабабли йўлнинг фақат асфальт қопламаси янгиланмаяпти, балки унинг остки асоси ҳам узоқ муддатли юкламаларга мос равишда тўлиқ қайта тайёрланмоқда.
Қурилиш жараёнида йўл қисми 2 метрдан ортиқ чуқурликкача қазилиб, мавжуд грунт ва намлик билан боғлиқ муаммолар бартараф этилмоқда. Йўл асосининг барқарорлигини ошириш ҳамда намликнинг юқори қатламларга таъсирини камайтириш учун геотекстил материаллари қўлланмоқда.
Мазкур технология орқали:
йўл остида намлик тўпланишининг олдини олиш;
грунтнинг силжиши ва чўкиши хавфини камайтириш;
оғир автобуслар қатновига бардош берадиган мустаҳкам асос яратиш;
йўл қопламасида деформация ва чўкишлар юзага келишининг олдини олиш кўзда тутилган.
BRT инфратузилмаси қандай ташкил этилади?
Йўл конструкциясини шакллантиришда Тошкент шаҳрида фойдаланилаётган автобусларнинг техник кўрсаткичлари, оғирлиги, ушбу йўналишдаги кунлик қатновлар сони ҳамда йўлга тушадиган доимий юклама ҳисобга олинмоқда.
Лойиҳа доирасида 1,2 километрлик участкада:
BRT тизимига мос 5 та автобус бекати ташкил этилади;
автобуслар учун алоҳида ҳаракат йўлаги ажратилади;
махсус йўлак умумий қатнов қисмидан бордюрлар орқали жисмонан ажратилади.
Бундай ечим автобусларнинг умумий транспорт оқимига, бошқа транспорт воситаларининг эса BRT йўлагига қўшилиб кетишининг олдини олиб, жамоат транспортининг узлуксиз ҳаракатланишига хизмат қилади.
Айни пайтда участкада йўл асосини тайёрлаш ва мустаҳкамлаш, шунингдек, BRT инфратузилмасини шакллантириш ишлари давом этмоқда.
Бажарилаётган ишларнинг кўлами ва технологик жараёнлардан келиб чиқиб, мазкур 1,2 километрлик участкадаги қурилиш-таъмирлаш ишларини 2026 йил 31 августга қадар якунлаш ва йўл қисмини фойдаланишга топшириш режалаштирилган.
Бу Шаҳрисабз кўчасидаги BRT лойиҳасининг биринчи босқичи бўлиб, кейинги босқичларда махсус йўлакни Шаҳрисабз кўчаси бўйлаб давом эттириш кўзда тутилган.
