Тошкент шаҳрида Йўл ҳаракатини ташкил этиш марказининг хабар беришича, ўтказилган синовлар натижасига кўра, Жанубий вокзалдан Grand Mir Hotel томон ҳаракатланиш вақти 11 дақиқа 30 сониядан 8 дақиқага қисқарган. Қизил чироқда тўхташлар сони эса 6 тадан 2 тага камайган.
Қарама-қарши йўналишда, яъни Grand Mir Hotelдан Жанубий вокзал томон ҳаракатланиш вақти 12 дақиқадан 8 дақиқа 30 сонияга тушган. Бу йўналишда ҳам қизил чироқда тўхташлар сони 6 тадан 2 тага қисқарган.
Шу тариқа, ҳар икки йўналишда йўлга сарфланадиган вақт 3 дақиқа 30 сонияга, яъни қарийб 30 фоизга камайган.
«Яшил тўлқин» қандай ишлайди?
Тизим барча светофорларда яшил чироқнинг бир вақтда ёнишига асосланмайди. Автомобиль йўлнинг муайян қисмини босиб ўтиши учун зарур вақт ҳисобга олиниб, кейинги светофорларда яшил сигналнинг ёниши белгиланган вақт оралиғи асосида созланади.
Ҳайдовчи йўналишга яшил чироқда кириб, белгиланган тезлик меъёрига амал қилган ҳолда бир маромда ҳаракатланса ва транспорт оқими эркин бўлса, кейинги светофорларга яшил сигнал вақтида етиб бориши мумкин.
«Яшил тўлқин» тезликни ошириш учун эмас, балки транспорт воситаларининг бир маромда ва хавфсиз ҳаракатланишини таъминлаш учун жорий этилган.
Тизим светофорлар олдидаги ортиқча тўхташлар, чорраҳалардаги навбатлар ва кутиш вақтини камайтириш, шунингдек, ёнилғи сарфи ҳамда зарарли чиқиндилар ҳажмини қисқартиришга хизмат қилади.
Ҳайдовчиларга белгиланган тезлик меъёрига амал қилиш, кескин тезлашиш ва тормозлашдан сақланиш, хавфсиз оралиқ масофани сақлаш, светофор сигналларига қатъий риоя қилиш ва пиёдаларга йўл бериш тавсия этилади.
