Ҳайдовчи томонидан эълон қилинган кадрларда, жанжал аёлнинг фарзанди ўриндиқни тинмай тепавергани учун ҳайдовчи танбеҳ берганидан сўнг бошланган. Шундан сўнг ҳайдовчи йўловчидан машинадан тушишни талаб қилган, бироқ аёл буни рад этиб, телефон орқали укасини чақирган.
Воқеа жойига келган аёлнинг танишлари дастлаб ҳайдовчини шилқимликда айблаб, видеолар олган ва тармоққа жойлаган. Кейинчалик бу видеолар ўчириб ташланган. Тарқалган видеоларда аёлнинг танишлари ҳайдовчини уришга уринаётганини кўриш мумкин. Кўп ўтмай ҳайдовчи салондаги воқеалар акс этган видеоларни эълон қилиб, можаронинг асл сабабини очиқлаган.
Тошкент шаҳри ИИББ хабарига кўра, ҳодиса 17 август куни Яшнобод туманининг Абдулла Қодирий кўчасида содир бўлган. Воқеа жойига аёлнинг икки нафар таниши етиб келган. Улар жамиятда юриш-туриш қоидаларини қасддан менсимасдан, жамоат тартибини бузиб ҳайдовчи билан ўзаро жанжаллашиб кетган.
Расмий маълумотларга кўра, йўловчи аёлнинг укасига нисбатан Жиноят кодексининг 277-моддаси (безорилик) билан жиноят иши қўзғатилиб, қамоққа олинган. Ҳайдовчига туҳмат қилиб, уни асоссиз айблаган йўловчи аёлга нисбатан эса 139-модданинг 2-қисми (интернет тармоғида жойлаштириш орқали туҳмат қилиш) билан жиноят иши қўзғатилган.
Ҳозирда тергов ҳаракатлари давом этмоқда.
