Ўзбекистоннинг Истанбулдаги Бош консулхонаси маълум қилишича, айни пайтда 10 нафарга яқин фуқарога нисбатан тергов-суриштирув ишлари олиб борилмоқда.

Туркия Ички ишлар вазирлигининг тегишли тузилмаларидан олинган дастлабки маълумотларга кўра, ушбу фуқароларнинг айримлари суд қарори асосида жазони ижро этиш муассасасида, бошқалари депортация марказида сақланмоқда.

Яна бир қисми мамлакат ҳудудидан чиқмаслик шарти билан озод қилинган ва уларга нисбатан тергов ҳаракатлари давом эттирилмоқда.

Фуқароларга нисбатан қўлланилаётган ҳуқуқий чоралар уларнинг ҳолатга алоқадорлик даражаси, банк ҳисобварақлари орқали ўтказилган маблағлар миқдори ва тергов давомида аниқланаётган бошқа ҳолатлардан келиб чиқиб белгиланмоқда.

Ўзбекистоннинг Истанбулдаги Бош консулхонаси вазиятни Туркиянинг тегишли идоралари билан ҳамкорликда кузатиб бормоқда. Фуқароларнинг қонуний ҳуқуқ ва манфаатларини ҳимоя қилиш доирасида зарур консуллик-ҳуқуқий кўмак кўрсатилмоқда.

Бош консулхона фуқароларни шахсий банк карталари, ҳисоб рақамлари ва мобил банк хизматларидан фойдаланиш имкониятини бошқа шахсларга бермасликка чақирди. Шунингдек, келиб чиқиши номаълум маблағларни қабул қилмаслик ва бошқа шахсларнинг илтимосига кўра уларни ўтказмаслик тавсия этилди.

Қайд этилишича, банк картаси ёки ҳисоб рақамини бошқа шахсларга фойдаланиш учун бериш, шунингдек, келиб чиқиши номаълум маблағларни ўтказишда воситачилик қилиш Туркия қонунчилигига мувофиқ жиддий ҳуқуқий жавобгарликка сабаб бўлиши мумкин.

Бош консулхона Туркияда бўлиб турган Ўзбекистон фуқароларини мамлакат қонунларига қатъий риоя қилиш ва шубҳали молиявий операцияларда иштирок этмасликка чақирди.