Халқаро курьерлик жўнатмалари орқали наркотик моддаларни трансчегаравий ўтказишга уринишларнинг олдини олиш мақсадида республикамиз божхоначилари томонидан доимий тезкор чора-тадбирлар амалга ошириб келинмоқда.
Жумладан, яқинда “Тошкент-АЭРО” ИБК Контрабандага қарши курашиш шоъбаси ходимлари томонидан “Электрон тижорат” ТИФ божхона пости ҳамда ДХХ ходимлари билан ҳамкорликда ўтказилган тезкор тадбирда халқаро курьерлик жўнатмаси орқали гиёҳвандлик моддаларини ноқонуний олиб киришга уриниш бартараф этилди.
Гап шундаки, Таиланддан келган жўнатмалардан бирида ҳужжатларга кўра қуруқ мева ва ширинликлар бўлиши лозим эди.
Аммо, жўнатмадаги қадоқланган ёнғоқлар божхона ходимларининг диққатини тортди. Боз устига, ўзимизда ҳам мўл-кўл бўлган бу каби оддий ёнғоқлар хорижда юбориладиган даражада танқис маҳсулот ҳисобланмаса!
Хуллас, шубҳалар тасдиғини топди – ёнғоқлардан айримларининг ичига гиёҳвандлик моддалари моҳирлик билан хуфиёна жойлангани фош этилди.
Пойтахтимизнинг Сергели туманида ўтказилган тезкор тадбир давомида ушбу жўнатмани қабул қилиб олишга келган 43 ёшли фуқаро ҳам қўлга олинди.
Божхона қўмитаси Марказий божхона лабораториясининг суд экспертиза хулосасига кўра, 120 дона ёнғоқ ичига жойланган модда жами 285,4 грамм оғирликдаги “марихуанна” гиёҳвандлик воситаси эканлиги маълум бўлди.
Ҳолат юзасидан “Тошкент-АЭРО” ИБКнинг Суриштирув ва маъмурий амалиёт шоъбаси томонидан жиноят иши қўзғатилиб, тергов органига юборилди.