Лойиҳа Дангсюн туманида, денгиз сатҳидан 4550 метр баландликда барпо этилмоқда. У “Wumatang” лойиҳаси номи билан ҳам маълум.
Мазкур станция оддий қуёш панелларидан фарқли равишда концентрланган қуёш энергияси (CSP) технологияси асосида ишлайди. Унда эгилган кўзгулар орқали қуёш нури махсус суюқлик тўлдирилган қувурларга йўналтирилади. Қиздирилган суюқлик эса эриган туз сақланадиган резервуарларни иситади ва бу тизим катта “иссиқлик батареяси” вазифасини бажаради.
Шунинг ҳисобига станция қуёш ботгандан кейин ҳам 6 соатгача электр энергияси ишлаб чиқариш имконига эга бўлади.
Лойиҳани амалга ошириш юқори тоғ шароити сабаб мураккаб кечмоқда. Кам ҳаво босими ва кескин ҳарорат фарқлари ишчилар учун қийинчилик туғдирмоқда. Шу боис қурилиш майдонида махсус иситиш ва кислород таъминоти тизимлари жорий қилинган.
Экологик жиҳатдан ҳам лойиҳа “қуёш плюс чорвачилик” модели асосида ишлаб чиқилаяпти. Яъни, қуёш ускуналари ердан баланд қилиб ўрнатилиб, маҳаллий чорва ҳайвонларининг эркин ўтлашига имконият сақлаб қолинади.
Маълум қилинишича, станция 2027 йилда тўлиқ ишга туширилади. У йилига тахминан 719 миллион киловатт-соат электр энергияси ишлаб чиқаради. Бу эса ҳар йили қарийб 216,9 минг тонна кўмир ёқилишининг олдини олиб, атмосферага чиқадиган карбон гази миқдорини 652 минг тоннадан ортиққа камайтиради.
Лойиҳа China General Nuclear Power Corporation томонидан амалга оширилмоқда.
