Қўмитага ижтимоий тармоқлар орқали хорижлик фуқаролар Б.К. ва Б.А. «Centrum Air» авиакомпанияси томонидан рейс бекор қилинганига қарамай, чипта учун тўланган маблағлар қайтарилмаётганидан шикоят қилган.
Ўрганишлар давомида мурожаатчиларда Боку — Тошкент — Бангкок ҳамда Бангкок — Тошкент — Боку йўналишлари бўйича авиачипталар мавжудлиги аниқланган. Бироқ авиакомпания томонидан 13 июль куни Тошкент — Бангкок ва 20 июль куни Бангкок — Тошкент рейслари бекор қилинган.
Шу сабабли йўловчилар янги авиачипталар харид қилиб, сафарларини бошқа рейслар орқали амалга оширган.
Қайд этилишича, аэропортда авиакомпаниянинг расмий вакиллари чипта қийматини 100 фоиз қайтариш ҳуқуқини тасдиқловчи, авиакомпания муҳри қўйилган расмий қайтариш далолатномасини берган. Бироқ маблағлар белгиланган муддатда йўловчиларга қайтарилмаган.
Рақобат қўмитаси ўрганишлари натижасида фойдаланилмаган авиачипталар учун тўланган 9 млн 700 минг сўмдан ортиқ, яъни 808,62 АҚШ доллари маблағ йўловчиларга «Centrum Air» томонидан тўлиқ қайтарилиши таъминланди.
Шунингдек, юзага келган ноқулайликлар инобатга олиниб, авиакомпания ҳар икки йўловчига «Centrum Air»нинг исталган мунтазам йўналиши бўйича бир марталик бепул парвоз қилиш имконини берувчи сертификат тақдим этишга қарор қилди.
