Бу ҳақда Хорватия радио ва телевидениеси (HRT) хабар берди.
Загребдан тахминан 65 километр узоқликда жойлашган Свети-Иван-Жабно муниципалитетида йўловчи ва юк поездлари тўқнашиб кетган. Ҳодиса жойига барча фавқулодда хизматлар етиб келган. Ҳозирча тўқнашув сабаби аниқланмоқда.
Хорватия Шошилинч тиббий ёрдам институти маълумотларига кўра, ҳодиса оқибатида 24 киши жабрланган ва уларнинг барчасига тиббий ёрдам кўрсатилган. 12 кишини даволаш шифохоналарда давом эттирилмоқда, улардан уч нафари оғир аҳволда.
Хорватия транспорт вазири ва бош вазир ўринбосари Олег Бутковичнинг таъкидлашича, ҳалокат яқинда қурилган ва таъмирланган темирйўл тармоғида содир бўлган. Йўловчи электр поезди ҳам яқинда фойдаланишга топширилган. Шу муносабат билан у техник носозликни ҳалокат сабабларидан бири эканини истисно қилган, деб хабар берди report.az.
"Афсуски, инсон омили ҳар доим мавжуд. Бироқ тергов якунларини кутиб турайлик, шундан сўнг ҳаракатга киришамиз", деди у.
Вазирнинг қўшимча қилишича, тергов ишлари якунланганидан сўнг поездлар ҳаракати қайта тикланади.
