Қозоғистон Президенти Қосим-Жомарт Тоқаев билан мулоқотда Ўзбекистон Президенти Шавкат Мирзиёевнинг самимий саломи ва эзгу тилаклари етказилди.
«Қозоғистон биз учун шунчаки қўшни юрт эмас, балки яқин дўст, ишончли стратегик ҳамкор ва иттифоқчидир. Қосим-Жомарт Кемелевичга илиқ қабул ва мамлакатларимиз ўртасидаги қардошлик-биродарлик ришталарини янада мустаҳкамлаш борасидаги қатъий интилишлари учун чуқур миннатдорлик изҳор қиламан», — деди Ўзбекистон Президенти Администрацияси раҳбари.
Ташриф давомида Қозоғистон Республикаси Президенти Администрацияси раҳбари Роман Скляр билан ҳам учрашув бўлиб ўтди. Томонлар Ўзбекистон–Қозоғистон шериклик муносабатларининг бугунги ҳолати ва истиқболларини муҳокама қилиб, олий даражада эришилган келишувларнинг изчил ва тўлиқ ижросини таъминлаш мақсадида президент администрациялари ўртасида янада яқин, тезкор ва самарали ҳамкорлик механизмларини йўлга қўйишга келишиб олдилар.
Шунингдек, Қозоғистон Республикаси Давлат маслаҳатчиси Ерлан Карин билан ўтказилган мулоқотда узоқ муддатли ҳамкорликнинг устувор йўналишлари кўриб чиқилди. Хусусан, маданий дипломатияни ривожлантириш, мамлакатлар ўртасидаги ҳамжиҳатликни мустаҳкамлашда ёшларнинг ўрни ҳамда юқори технологиялар соҳасидаги истиқболли ҳамкорлик масалалари муҳокама қилинди.
Делегация Остона шаҳридаги «Остона» халқаро молия маркази фаолияти билан ҳам танишди. Қайд этилишича, Ўзбекистонда Тошкент халқаро молия марказини ташкил этиш бўйича ишлар олиб борилаётган бир пайтда Қозоғистоннинг мазкур соҳадаги тажрибасини ўрганиш муҳим аҳамиятга эга.
Томонлар молиявий инфратузилмани ривожлантириш ва ўзаро тажриба алмашиш орқали нафақат икки мамлакат, балки бутун Марказий Осиёга инвестициялар оқимини кенгайтириш мумкинлигини таъкидладилар.
