Сув хўжалиги вазири биринчи ўринбосари Зокир Ишпўлатовнинг маълум қилишича, географик номларни лингвистик меъёрлар асосида қайта кўриб чиқишдан мақсад давлат тили қоидаларининг тўлиқ ва тўғри қўлланилишини таъминлаш, шунингдек, турли манбаларда ҳар хил ёзиб келинган номларни ягона шаклга келтиришдан иборат.
Шу муносабат билан Вазирлар Маҳкамасининг 2025 йил 10 ноябрдаги қарори асосида мамлакатдаги дарёлар, сойлар, кўллар, булоқлар, шаршаралар, сув омборлари ва сел сув омборлари номлари давлат тили меъёрларига мувофиқлаштирилди.
Қарор доирасида жами 130 та сув объекти номи қайта кўриб чиқилди. Хусусан,
- Уйчи туманидаги “Сассиқсой” сел сув омбори “Шўрсув”,
- Янгиқўрғон туманидаги “Гаистон” сел сув омбори “Янгиқўрғон”,
- Китоб туманидаги Жиннидарё “Зўғатасой”,
- Қумқўрғон туманидаги “Жанубий Сурхон” сув омбори эса “Сурхон” деб номланди.
Таъкидланишича, мазкур жараён нафақат тил қоидаларини бирхиллаштириш, балки тарихий-географик ҳақиқатни тўғри акс эттириш, маҳаллий аҳоли қўллайдиган анъанавий номларни сақлаш ва давлат тили нуфузини мустаҳкамлашга ҳам хизмат қилади.
Шунингдек, Сув хўжалиги вазирлиги ва Кадастр агентлиги томонидан расмий ҳужжатлар, хариталар ҳамда маълумотлар базаларига тегишли ўзгартиришлар киритилган.
Айни пайтда мамлакатдаги қарийб икки мингта сув объекти хатловдан ўтказилиб, уларни ягона давлат реестрига киритиш ишлари давом эттирилмоқда.
