Ўзбекистонда 7 ойда меҳнат фаолияти билан боғлиқ 529 та бахтсиз ҳодиса қайд этилди

Давлат меҳнат инспекцияси маълумотларига кўра, мазкур даврдаги бахтсиз ҳодисаларнинг 24 таси гуруҳий тарзда содир бўлган. Ҳодисалар оқибатида 146 нафар киши ҳалок бўлган, 402 нафар фуқаро оғир жароҳат олган, яна 22 нафар шахс енгил жароҳатланган.

Ҳудудлар кесимида энг кўп бахтсиз ҳодиса Тошкент шаҳрида — 58 та, Тошкент вилоятида — 58 та, Қашқадарё вилоятида — 38 та, Бухоро ва Андижон вилоятларида — 33 тадан қайд этилган.

Энг кам кўрсаткич Хоразм вилоятида — 13 та, Жиззах ва Сурхондарё вилоятларида — 16 тадан ҳамда Наманган вилоятида 18 тани ташкил этган.

Соҳалар кесимида эса меҳнат билан боғлиқ бахтсиз ҳодисаларнинг асосий қисми саноат тармоғига тўғри келган — 168 та. Қурилиш соҳасида 159 та, савдо ва хизматларда 22 та, транспорт ва логистикада 20 та, соғлиқни сақлашда 16 та, қишлоқ ва сув хўжалигида 15 та ҳодиса қайд этилган.

Шунингдек, таълим соҳасида 14 та, давлат бошқарувида 8 та, ҳуқуқни муҳофаза қилиш тизимида 4 та, ахборот технологияларида 3 та, маданият ва спорт соҳасида 2 та ҳамда бошқа соҳаларда 98 та бахтсиз ҳодиса содир бўлган.