Лойиҳа Чиқиндиларни бошқариш ва циркуляр иқтисодиётни ривожлантириш агентлиги ҳамда чиқиндиларни автоматик йиғиш ва саралаш технологиялари соҳасида фаолият юритувчи Норвегиянинг TOMRA компанияси ҳамкорлигида амалга оширилмоқда.
Пилот лойиҳа доирасида аҳолидан пластик, шиша ва алюминий ичимлик идишларини алоҳида йиғиш ва қайта ишлашга топширишни рағбатлантириш тизими жорий этилди.
Эндиликда аҳоли сараланган ичимлик идишларини махсус фандоматларга топшириб, ҳар бир идиш учун 150 сўм миқдорида рағбат олиши мумкин.
Қурилмадан фойдаланган фуқаро икки вариантдан бирини танлайди. Биринчи ҳолатда қабул қилинган ҳар бир идиш учун 150 сўм тўланади ва маблағ Click электрон ҳамёнига ўтказилади.
Иккинчи вариантда эса фуқаро тўловни хайрияга йўналтириши мумкин. Бунда йиғилган идишларни сотишдан тушган маблағлар хайрия мақсадлари ҳамда дарахт экиш ташаббусларига сарфланади.
Фандоматлар ичимлик идишларини бошқа маиший чиқиндиларга аралаштирмасдан алоҳида йиғиш ва уларни қайта ишлаш имконини беради. Сараланган материаллардан иккиламчи хомашё олиниб, янги маҳсулотлар ишлаб чиқаришда қайта фойдаланиш мумкин.
Бу табиий ресурслардан фойдаланишни камайтириш, шунингдек, чиқиндиларнинг кўчалар, сув ҳавзалари ва полигонларга тушишини қисқартиришга хизмат қилиши кутилмоқда.
Лойиҳадан чиқиндиларни саралашни кундалик одатга айлантириш ва аҳолининг экологик маданиятини ошириш ҳам мақсад қилинган. Ташаббус орқали фойдаланилган ичимлик идишининг оддий чиқинди эмас, балки қайта ишланадиган ва иқтисодий қийматга эга ресурс эканини кўрсатиш кўзда тутилган.
Пилот лойиҳа ўзини оқласа, келгусида фандоматларни республикадаги аҳоли гавжум жойларга босқичма-босқич ўрнатиш режалаштирилган.
