Кейинги йилларда мамлакатда истеъмолчиларнинг ҳуқуқ ва қонуний манфаатларини ҳимоя қилиш, ички бозорда муомалага чиқарилаётган маҳсулотлар хавфсизлигини таъминлаш ҳамда тадбиркорлик субъектлари учун адолатли ва шаффоф рақобат муҳитини шакллантиришга қаратилган ислоҳотлар амалга оширилмоқда.

Бироқ амалда инсон ҳаёти, соғлиғи, мол-мулки ва атроф-муҳит учун хавф туғдириши мумкин бўлган ноозиқ-овқат маҳсулотларини аниқлаш, уларни муомаладан чиқариш ва ваколатли давлат органларининг ўзаро ҳамкорлигини таъминлаш билан боғлиқ муносабатларни ягона ҳуқуқий асосда тартибга солувчи алоҳида қонун мавжуд эмас эди.

Янги қонун билан ушбу соҳада ягона ҳуқуқий механизм жорий этилмоқда.

Хусусан, бозор назоратини амалга оширишнинг асосий принциплари, ваколатли давлат органлари ҳамда иқтисодий операторларнинг ҳуқуқ ва мажбуриятлари, назорат тадбирларини ўтказиш тартиби ва таъсир чораларини қўллашнинг аниқ ҳуқуқий асослари белгиланмоқда.

Шунингдек, бозор назоратини хавф-хатарларни баҳолаш асосида ташкил этиш, назорат харидларини амалга ошириш ва маҳсулотларни лаборатория синовларидан ўтказиш механизмлари жорий этилади.

Хавфли деб топилган маҳсулотларни муомаладан чиқариш ва чақириб олиш, шунингдек, бу ҳақда истеъмолчиларни тезкор хабардор қилиш тартиби ҳам белгиланмоқда.

Қонун билан тадбиркорлик субъектлари — иқтисодий операторларнинг ҳуқуқлари ҳам кафолатланади.

Жумладан, уларга:

  • бозор назорати тадбирларида иштирок этиш;
  • назорат материаллари билан танишиш;
  • назорат жараёнида аудио ва видеоёзувларни амалга ошириш;
  • ваколатли органлар қарорлари устидан белгиланган тартибда шикоят қилиш ҳуқуқлари берилади.

Сенаторларнинг таъкидлашича, мазкур кафолатлар тадбиркорлик субъектларининг қонуний манфаатларини ҳимоя қилишга хизмат қилади.

Қонуннинг қабул қилиниши натижасида ички бозорда хавфсиз ва белгиланган талабларга жавоб берадиган маҳсулотлар муомалада бўлишини таъминлаш, истеъмолчилар ҳуқуқларини самарали ҳимоя қилиш, давлат назоратининг очиқлиги ва шаффофлигини ошириш ҳамда ҳалол тадбиркорлик муҳитини мустаҳкамлаш мақсад қилинмоқда.

Шунингдек, ҳужжат мамлакатда бозор назоратининг замонавий ва самарали тизимини шакллантиришга хизмат қилиши кутилмоқда.

Муҳокама якунида сенаторлар «Бозор назорати тўғрисида»ги қонунни маъқуллади.