Vazirlar Mahkamasining 2019-yil 27-sentabrdagi “Keksa avlod vakillarining jamiyatdagi o‘rni va ijtimoiy faolligini yanada oshirish chora-tadbirlari to‘g‘risida”gi qarori bilan har yili oktabr oyining birinchi haftasi “Keksalar haftaligi” etib belgilangan.

Mazkur haftalik doirasida “Mahalla va oila” ilmiy-tadqiqot instituti tomonidan nuroniylar ishtirokida “Keksalik va ma’naviy meros” hamda “Keksalari e’zozlangan yurt” nomli kitoblar chop etilib, taqdimoti o‘tkazildi.

Tadqimot ochilish marosimida institut direktori, professor Nodira Egamberdiyeva shunday dedi:

– Keksa avlod vakillarini e’zozlash, hozirgi osoyishta kunlarimiz uchun sidqidildan mehnat qilgan insonlarga hurmat va ehtirom ko‘rsatish, ularni qadrlash xalqimizga xos hislatlardan sanaladi. Shu maqsadda biz mahalla hamda oilalarning tinch va osoyishta bo‘lishida aynan yoshi ulug‘ nuroniy otaxon va onaxonlarimizning uzoq yillik hayotiy tajribasiga tayanamiz. Ularning bosib o‘tgan samarali va sermazmun hayot yo‘llaridan o‘rnak olamiz. Yangi nashrdan chiqqan “Keksalik va ma’naviy meros” hamda “Keksalari e’zozlangan yurt” nomli kitoblarda ham aynan nuroniylarning hayotiy tajribalari aks ettirilgan.