Ушбу кунда фуқаролар, айниқса, давлат фуқаролик хизматчиларидан шахсий ва хизмат автомобилларидан фойдаланмаслик, жамоат транспорти ҳамда экологик тоза ҳаракатланиш воситаларини танлаш сўралмоқда.
Маълум қилинишича, акция Президентнинг 2026 йил 25 мартдаги «Атмосфера ҳавоси сифатини яхшилашга қаратилган “Тоза ҳаво” умуммиллий лойиҳасини амалга ошириш чора-тадбирлари тўғрисида»ги фармони асосида ҳар ойнинг 10 ва 25-саналарида ўтказиб келинмоқда.
Ташаббуснинг асосий мақсади автотранспорт воситаларидан атмосферага чиқариладиган зарарли ташламаларни камайтириш, экологик муҳитни яхшилаш ва жамоат транспортидан фойдаланиш маданиятини кенг тарғиб қилишдан иборат.
Акциялар доирасида Экология миллий қўмитаси ва унинг ҳудудий бошқармалари ходимлари ҳам хизмат ва шахсий автомобилларидан воз кечиб, жамоат транспорти, велосипед ва бошқа экологик тоза ҳаракатланиш воситаларидан фойдаланмоқда.
Қўмита маълумотига кўра, «Автомобилсиз кун» ва «Автомобилсиз ҳафта» акциялари давлат фуқаролик хизматчилари учун мажбурий бўлиб, уларнинг бу кунларда автотранспорт воситаларидан фойдаланиши жавобгарликка сабаб бўлади.
Экология миллий қўмитаси давлат ва нодавлат ташкилотлари, шунингдек, барча фуқароларни акцияда фаол иштирок этишга, электромобиллар, жамоат транспорти ва бошқа экологик тоза ҳаракатланиш воситаларидан кўпроқ фойдаланишга чақирди.
