Ижтимоий ҳимоя миллий агентлиги директорининг биринчи ўринбосари Шаҳноза Мирзиёеванинг маълум қилишича, ҳозирда уларнинг аксарияти тўлақонли ва соғлом ҳаётга қайтмоқда.
«Президент ташаббуси ва «Вақф» хайрия жамоат фонди кўмагида мамлакат бўйлаб 18 мингга яқин бола ва катта ҳаёт учун зарур бўлган даволаниш курсларидан ўтди ҳамда юқори технологик ва мураккаб жарроҳлик амалиётларини бошдан кечирди. Бугун уларнинг кўпчилиги тўлақонли ва соғлом ҳаётга қайтмоқда», — деди Шаҳноза Мирзиёева.
Улар орасида Фирдавс исмли бола ҳам бор. Шаҳноза Мирзиёева тиббиёт муассасасида даволанаётган боладан хабар олган.
Ижтимоий ҳимоя миллий агентлигининг маълум қилишича, оғир хасталик туфайли бола шу пайтга қадар фақат зонд орқали овқатланишга мажбур бўлган. Яқинда шифокорлар томонидан унга қизилўнгачни қайта тиклаш бўйича мураккаб жарроҳлик амалиёти муваффақиятли ўтказилган.
«Фирдавсга ва айни пайтда соғайиш босқичида бўлган барча юртдошларимизга тез фурсатда тўлиқ соғайиб кетишларини тилайман. Ўзингизни асранг, барча эзгу орзу-истакларингиз рўёбга чиқсин», — деди Шаҳноза Мирзиёева.
Ҳар бир муваффақиятли даволаниш ортида замонавий тиббиёт билан бир қаторда, инсон тақдирига эътибор ва катта умид мужассам.
