Бу ҳақда 19 октябрь куни Сув хўжалиги вазирлигида ўтказилган матбуот анжуманида маълум қилинди.
«Каналларни бетонлаштириш — сув йўқотишларини камайтириш ва суғориш самарадорлигини оширишнинг муҳим омили» мавзусидаги анжуманда суғориш тармоқларини модернизация қилиш, ерларнинг мелиоратив ҳолатини яхшилаш ҳамда аҳоли томорқаларини сув билан таъминлаш борасидаги ишлар ҳақида ахборот берилди.
Қайд этилишича, 2026 йилнинг дастлабки тўққиз ойида асосий дастур доирасида 70 та лойиҳа бўйича 537 километр канал бетонлаштирилган. Шунингдек, 26 километр лоток ва 33 километр ёпиқ суғориш тармоқлари реконструкция қилинган.
Қўшимча ажратилган 422 миллиард сўм ҳисобидан 53 та лойиҳа доирасида 388 километр канални бетонлаштириш белгиланган. Тўққиз ой давомида ушбу лойиҳалар доирасида 215 километр канални бетонлаштириш ишлари бажарилган.
Коллектор-дренаж тармоқларини яхшилаш бўйича ҳам ишлар амалга оширилмоқда. 2017–2026 йилларда 7 163 километр коллектор-дренаж тармоғи қурилган ва реконструкция қилинган. Шунингдек, 129 541 километр тармоқда таъмирлаш-тиклаш ишлари бажарилган.
Аҳоли томорқаларини сув билан таъминлаш мақсадида 2025 йилда «Камбағалликдан фаровонлик сари» дастури доирасида 892 та лойиҳа амалга оширилган. Натижада 505 минг хонадонда яшовчи 2,7 миллион нафар аҳоли фойдаланаётган 92 минг гектар ер майдонининг сув таъминоти яхшиланган.
Маълум қилинишича, 2027 йилда 48 та янги объект доирасида 406 километр канални бетонлаштириш ва 5 километр лоток тармоғини реконструкция қилиш таклифлари ишлаб чиқилган.
Матбуот анжуманида каналларнинг техник ҳолатини яхшилаш, сувнинг ерга сингиб йўқолишини камайтириш ва сув ресурсларидан самарали фойдаланиш масалалари ҳам муҳокама қилинди.
