Бундай шахслар турли алдов ва психологик таъсир усулларидан фойдаланиб, фуқароларни ўз тузоғига илинтирмоқда.
Тошкент вилояти Ички ишлар бош бошқармаси Ахборот технологиялари соҳасидаги жиноятларга қарши курашиш бошқармаси тезкор ходимлари томонидан олиб борилган тезкор-қидирув тадбирлари давомида айнан шундай усулда фаолият юритиб келган жиноий гуруҳ фош этилди.
Аниқланишича, гуруҳ аъзолари интернет тармоқларида “фоизсиз кредит олиб берамиз” мазмунидаги турли эълонларни жойлаштириб, ушбу таклифларга қизиқиш билдирган фуқароларни олдиндан ижарага олинган ҳашаматли офисларга таклиф қилган. Улар фуқароларга кредитни ўз номларига расмийлаштириб беришни таклиф қилиб, бунинг эвазига ажратилган маблағнинг маълум қисмини ўзлаштиришган.
Хусусан, фирибгарлар фуқароларга:“Сизнинг номингизга 100 миллион сўм кредит олиб берамиз. Унинг 50 миллион сўми сизга берилади, қолган 50 миллион сўми эса компанияда қолади. Кредитнинг ойлик тўловларини эса ўзимиз тўлаб борамиз, сизга ҳеч қандай муаммо бўлмайди”, дея ваъда беришган.
Уларнинг ёлғон ваъдаларига ишонган фуқаролар ўз телефонлари орқали кредит расмийлаштириш жараёнларини амалга оширган. Натижада, 400 нафардан ортиқ фуқаронинг номига кредитлар расмийлаштирилиб, ажратилган маблағларнинг тенг ярмини фирибгарлар қўлга киритишган. Ўзлаштирилган маблағларнинг умумий миқдори қарийб 17 миллиард сўмни ташкил этади.
Орадан маълум вақт ўтгач, фуқароларга банклар томонидан кредит қарздорлигини ундириш бўйича талабномалар юборила бошланган. Мазкур ҳолат юзасидан Ўзбекистон Республикаси Жиноят кодексининг 168-моддаси (Фирибгарлик) билан жиноят иши қўзғатилди.
Терговга қадар текширув ва тезкор тадбирлар давомида жиноий гуруҳнинг 6 нафар аъзоси гумонланувчи тариқасида ушланган ва қамоққа олинган. Ҳозирда жиноят иши юзасидан тергов ҳаракатлари давом эттирилмоқда.
ИИББ огоҳлантиради!
Ҳурматли юртдошлар! Интернет тармоқларидаги “фоизсиз кредит”, “жуда кам фоизли кредит”, “ҳужжатсиз кредит” каби шубҳали таклифларга ишониб, номаълум шахсларга шахсий маълумотларингизни тақдим этманг.
Айниқса, кредитни сизнинг номингизга расмийлаштириб, унинг тўловларини бошқа шахслар амалга ошириб бориши ҳақидаги ваъдаларга алданманг. Зеро, кредит сизнинг номингизда расмийлаштирилган бўлса, банк олдидаги мажбурият ҳам, аввало, сизнинг зиммангизда қолади.
Унутманг: Осон ва тез даромад ёки “текин” молиявий имконият ваъдаси ортида фирибгарлик бўлади. Огоҳ бўлинг, ўз молиявий хавфсизлигингизни ҳимоя қилинг!
