Бу ҳақда Amu.tv хабар берди Афғонистоннинг табиий офатларни бошқариш идорасига таяниб.

Маълумотларга кўра, 26 мартдан буён давом этаётган тошқинлар қарийб 6 минг оилани қамраб олган. 3 600 дан ортиқ уй вайрон бўлган, қишлоқ хўжалиги ерларининг катта қисми эса зарар кўрган.

Сўнгги бир сутка ичида 11 киши ҳалок бўлиб, яна 11 киши жароҳат олган. Тошқинлар Кобул, Нангарҳор, Қандаҳор, Ҳирот ва бошқа 20 дан ортиқ вилоятни қамраб олган.

Расмий маълумотларга кўра, 11 600 жераб (тахминан 5 700 акр) қишлоқ хўжалиги ерлари зарарланган. Шунингдек, 337 километрдан ортиқ йўл инфратузилмаси шикастланган, бу эса қутқарув ва ёрдам ишларини қийинлаштирмоқда.

Жабрланган ҳудудларда яшовчилар уй-жой, озиқ-овқат ва тоза ичимлик сувига муҳтож эканини билдирмоқда. Кўплаб оилалар ҳалигача бошпанасиз қолган.

Маҳаллий мутасаддилар қутқарув ишлари олиб борилаётганини маълум қилган бўлса-да, офат кўлами мавжуд имкониятлардан анча юқори экани қайд этилмоқда.

Айни пайтда, мамлакатдаги гуманитар вазият янада мураккаблашмоқда. Аввалроқ содир бўлган зилзила ҳам қурбонларга сабаб бўлиб, вазиятни оғирлаштирган.

Мутахассислар таъкидлашича, баҳор мавсумидаги кучли ёмғир ва қор эриши Афғонистонда сув тошқинлари хавфини оширади. Бу эса инфратузилмаси заиф ва иқтисодий қийинчиликка дуч келаётган ҳудудлар учун жиддий синов бўлиб қолмоқда.