Маълум қилинишича, музейда амалга оширилаётган ишлар муассаса фаолиятини тугатиш ёки маданий меросга зарар етказишга эмас, балки ноёб қўлёзмалар, архив ҳужжатлари ва бошқа экспонатларни замонавий шароитларда сақлаш, уларни рақамлаштириш ҳамда келажак авлодларга бекаму кўст етказишга қаратилган.
Қайд этилишича, Вазирлар Маҳкамасининг 2026 йил 20 майдаги 234-Ф-сонли фармойишига мувофиқ, Янги Тошкент шаҳрида барпо этилаётган музейнинг янги биноси фойдаланишга топширилгунга қадар фонд материаллари вақтинчалик бошқа муассасаларга кўчирилмоқда.
Хусусан, музей фондидаги қўлёзма ва тошбосма манбалар, шунингдек, «Ўзбекистон ёзувчилари ва шоирлари архиви» фонди Ўзбекистондаги Ислом цивилизацияси марказига, бошқа музей экспонатлари эса Фанлар академиясининг Антропология институтига вақтинча сақлаш учун жойлаштирилади.
Фанлар академияси маълумотига кўра, 2026 йил 9 июнь куни музейнинг 847 та ноёб қўлёзмаси белгиланган тартибда Ислом цивилизацияси марказининг махсус сақлаш хоналарига кўчирилган. Айни пайтда уларни вақтинча сақлашга оид ҳужжатлар расмийлаштирилмоқда.
Шунингдек, ҳозирга қадар 1 491 та тошбосма манба, 439 та папкадаги фотонусхалар, 145 та папкадаги плёнка ва негативлар ҳамда 1 миллион 416 минг 512 та ҳужжатдан иборат «Ўзбекистон ёзувчилари ва шоирлари архиви» фонди бирламчи хатловдан ўтказилган.
Ҳозирда музей томошабинлар ва тадқиқотчилар учун вақтинча ёпилган бўлса-да, муассаса ходимлари ўз хизмат вазифаларини давом эттирмоқда. Музей экспонатларини хатловдан ўтказиш ишлари изчил олиб борилмоқда.
Фанлар академияси барча жараёнлар қонунчилик талаблари асосида, масъул мутахассислар иштирокида амалга оширилаётганини таъкидлаб, жамоатчиликни ижтимоий тармоқлардаги асоссиз хабарларга эмас, расмий маълумотларга таянишга чақирди.
