Бугунги маросимда иштирок этаётган халқаро ташкилотлар раҳбарлари, хорижий давлатларнинг элчилари, туркий дунёнинг атоқли маданият, адабиёт ва санъат намояндаларини қизғин қутлаб, барчангизга юксак ҳурматим ва эзгу тилакларимни билдираман.
Фурсатдан фойдаланиб, Халқаро туркий маданият ташкилоти – ТУРКСОЙ раҳбарияти ва Ташкилотга аъзо давлатларга Андижон шаҳрини “Туркий дунёнинг маданият пойтахти” деб эълон қилганликлари учун чуқур миннатдорлик билдираман.
Ҳеч шубҳасиз, Андижон шаҳрининг бундай юксак шарафга муносиб кўрилганини Ўзбекистоннинг бой тарихи, маданий-маънавий мероси, юртимизнинг туркий маданият ривожига қўшган бебаҳо ҳиссаси, мамлакатимизда олиб борилаётган кенг кўламли ислоҳотларнинг халқаро миқёсдаги яна бир эътирофи сифатида қабул қиламиз.
Азиз дўстлар!
Ватанимизнинг шарқий дарвозаси бўлмиш Андижон асрлар давомида маданият, адабиёт, санъат ва ҳунармандлик соҳаларидаги марказлардан бири бўлиб келган. Бу табаррук заминдан улуғ саркарда ва давлат арбоблари, беназир алломалар, шоир ва адиблар, маҳоратли санъаткорлар етишиб чиққанини бутун туркий олам доимо миннатдорлик билан эътироф этади.
Бу ҳақда гапирганда, ушбу дилбар диёрнинг фахру ифтихори бўлган Бобур Мирзонинг улкан илмий ва адабий мероси, ҳарбий санъати, мумтоз шоиримиз Абдулҳамид Чўлпоннинг озодлик ва эркинлик қадри юксак пардаларда тараннум этилган ўлмас асарларининг ўзи кўп нарсадан далолат беришини таъкидлаш зарур. Миллий рақс санъатимизнинг ёрқин намунаси бўлмиш “Андижон полкаси”, одамларимизнинг беғубор қалби ва заковатини ўзида мужассам этган аския санъати нафақат бизнинг, балки бутун санъатсевар халқларнинг умумий маданий мулкига айланган, десак, муболаға бўлмайди.
Бу каби бебаҳо қадрият ва санъат дурдоналарини асраб-авайлаш ва бойитиш, улардан ёш авлодимиз ва жаҳон маданий жамоатчилигини кенг баҳраманд этиш борасида ТУРКСОЙ билан яқин ҳамкорликни юксак қадрлаймиз. Бу борада энг сара адабий асарларни ўз ичига олган 100 жилдлик “Туркий адабиёт дурдоналари” тўплами нашр этилиб, ўқувчилар қўлига етиб боргани, мамлакатларимизда биргаликда кўплаб илмий анжуман ва конференциялар, турли маданий тадбир ва тақдимотлар ўтказилаётгани, шу йилнинг апрель ойида Ислом цивилизацияси марказида ТУРКСОЙ офиси очилганини алоҳида таъкидлаш лозим.
Ўзбекистонлик санъат ва маданият намояндалари бугунги кунда халқаро саҳналарда, хусусан, ТУРКСОЙ томонидан ўтказилаётган нуфузли анжуманлар, фестиваль ва танловларда муваффақиятли иштирок этиб келмоқда. Хусусан, жорий йилнинг февраль ойида болалар рақс ва созандалик жамоаларимиз халқаро фестивалда Гран-прини қўлга киритгани барчамизни мамнун қилди.
Буларнинг барчаси халқларимизнинг теран илдизга эга қардошлик ришталари бугун ҳам тобора мустаҳкамланиб бораётганини яққол намоён этади.
Қадрли анжуман иштирокчилари!
“Андижон – Туркий дунёнинг маданият пойтахти” лойиҳаси доирасида бир йил давомида мамлакатимиз ва қардош юртларда ўтказиладиган фестиваль ва илмий анжуманлар, бадиий кеча ва ижодий учрашувлар маданий ҳаётимизда чуқур из қолдирадиган, дўстлик ва ҳамжиҳатлик ришталарини янада мустаҳкамлайдиган, ёш авлод учун кенг имкониятлар очадиган унутилмас воқеа бўлиб қолади деб ишонаман.
Сизларни яна бир бор чин дилдан табриклаб, барчангизга сиҳат-саломатлик, келгуси фаолиятингизга улкан зафарлар тилайман.
Ўзбекистон дурдонаси, олтин водий гавҳари – сўлим ва файзли Андижон шаҳрига хуш келибсиз, азизлар!
Шавкат Мирзиёев,
Ўзбекистон Республикаси Президенти
