Янги тартибга кўра, қарздорнинг банк карталари ҳисобларида камида 680 минг сўм миқдорида маблағ сақлаб қолиниши мумкин.
Тегишли ўзгартиришлар тижорат банклари фаолиятига, хусусан, уларнинг банк хизматлари истеъмолчилари билан муносабатларида қўйиладиган минимал талабларга оид низомга киритилиши режалаштирилмоқда. Айни пайтда мазкур лойиҳа жамоатчилик муҳокамасига қўйилган.
Ҳужжат лойиҳасига кўра, кредит ёки кафиллик мажбуриятлари бўйича тўловлар мижознинг алоҳида топшириғисиз ундирилган ҳолларда, банк қарздорнинг барча банк карталари ҳисобларида энг кам иш ҳақининг ярмига тенг маблағни сақлаб қолиши лозим бўлади. Ҳозирги кунда энг кам иш ҳақи 1 миллион 360 минг сўм этиб белгиланган бўлиб, унинг ярми 680 минг сўмни ташкил қилади.
Яъни, таклиф маъқулланиб, амалиётга жорий этилса, кредит қарздорлигини ундириш жараёнида фуқаронинг банк карталаридаги барча маблағлар тўлиқ ечиб олиниши чекланади. Бу эса қарздорнинг кундалик эҳтиёжлари учун маълум миқдорда маблағ сақланиб қолишига хизмат қилиши кутилмоқда.
Бироқ мазкур талаб шартномада мажбурий реквизитлари кўрсатилган банк карталарига ҳамда қарздорлик бўйича тўловларни ундириш мақсадида банкнинг мобил иловасига уланган карталарга нисбатан татбиқ этилмаслиги белгиланмоқда.
Эслатиб ўтамиз, аввалроқ UZCARD автоматик акцептсиз маблағ ечиб олиш хизмати шартларига ўзгартиш киритган эди. Жорий йилнинг 15 апрелидан бошлаб қарздорликни ундиришда банк картасида камида 3 БҲМ миқдоридаги камайтирилмайдиган қолдиқ сақлаб қолиниши белгиланган. Аммо ушбу қоида фақат UZCARD тўлов тизими доирасида амал қилади.
Марказий банкнинг янги таклифи эса бундай чекловларни кенгроқ доирада, яъни тижорат банклари фаолиятига қўйиладиган умумий талаблар даражасида белгилашни назарда тутмоқда.
Мазкур ташаббус кредит қарздорлигини ундириш жараёнида фуқароларнинг минимал молиявий манфаатларини ҳимоя қилиш, уларнинг ҳисобварақларида кундалик ҳаёт учун зарур маблағ сақланишини таъминлашга қаратилган. Лойиҳа жамоатчилик муҳокамасида бўлиб, муҳокама 14 сентябргача давом этади.
