20 октябрь куни «Ўзбекистон Республикасининг айрим қонун ҳужжатларига тадбиркорлик субъектлари учун тартибга солиш юкини камайтиришга қаратилган ўзгартириш ва қўшимчалар киритиш тўғрисида»ги ЎРҚ–1183-сон Қонун қабул қилинди.
Қонун билан Солиқ кодексининг 111 ва 112-моддаларига ўзгартириш ва қўшимчалар киритилди.
Унга кўра, солиқ тўловчи ёки солиқ агентининг банкдаги ҳисобварақлари бўйича операцияларни тўхтатиб туриш тўғрисидаги қарор солиқ органи раҳбари ёки унинг ўринбосари томонидан қабул қилиниши мумкин.
Агар солиқ тўловчи ёки солиқ агенти ушбу қарорга эътироз билдирса, солиқ органи эътироз тақдим этилган кундан кейин уч кундан кечиктирмай судга ариза киритиши мумкин. Бундай ҳолатда ҳисобварақлар бўйича операцияларни тўхтатиб туриш масаласи суд томонидан ҳал қилинади. Суд қарор қабул қилгунига қадар операциялар тўхтатиб турилади.
Шунингдек, Солиқ кодексининг 111-моддаси учинчи қисмида назарда тутилган ҳолатлар солиқ тўловчи ёки солиқ агенти томонидан бартараф этилса, солиқ органи операцияларни тўхтатиб туриш тўғрисидаги қарорини 112-моддага мувофиқ бекор қилади.
Кодекснинг 112-моддасига операцияларни тўхтатиб туришни рад этиш тўғрисидаги суд қарори қонуний кучга кирган кунни назарда тутувчи янги асос ҳам қўшилди.
Иқтисодий процессуал кодексига киритилган ўзгартиришларга мувофиқ, банк ҳисобварақлари бўйича операцияларни тўхтатиб туриш ҳақидаги аризага қуйидаги ҳужжатлар илова қилиниши лозим:
солиқ тўловчи томонидан операцияларни тўхтатиб туриш учун асос бўладиган қонун талаблари бузилганини тасдиқловчи далил;
солиқ органи солиқ тўловчига операциялар тўхтатиб турилиши ҳақида хабарнома юборганини тасдиқловчи далил;
солиқ тўловчининг солиқ органи қарори юзасидан билдирган эътирози.
Қонун расмий эълон қилинган кундан эътиборан кучга киради.
