2026 йил 20 октябрнинг 16 00дан 21 октябргача бўлган вақт оралиғида мусобақаларда ўзбекистонлик спортчилар бир қатор йўналишларда олтин медалларга сазовор бўлди.
Пауэрлифтинг бўйича 61 килограмм вазн тоифасида Муслима Нуриддинова ғолибликни қўлга киритди.
Пара сузиш бўйича SM8 классида 200 метрга комплекс усулда сузиш финалида Азизбек Бойназаров 2:23.87 натижа билан биринчи ўринни эгаллади. S13 классида 100 метрга брасс усулида сузиш баҳсларида эса Мубинабону Халилова 1:19.60 натижа билан олтин медални қўлга киритди.
Енгил атлетика бўйича ядро улоқтириш баҳсларида Мадина Мухторова F40 тоифасида 9,10 метр натижа билан ғолиб бўлиб, Параосиё ўйинлари рекордини ўрнатди. F41 тоифасида иштирок этган Наврўза Ахматова эса 10,02 метр натижа билан Осиё рекордини янгилади.
Шунингдек, пара велошоссе бўйича аёллар ўртасида T1–2 классида вақт пойгасида Маржона Пардабоева 25:58.04 натижа билан олтин медални қўлга киритди.
Пара дзюдо бўйича эркаклар ўртасида J2 классида, 95 килограммдан юқори вазн тоифасида Довурхон Кароматов барча рақибларини мағлуб этиб, шоҳсупанинг энг юқори поғонасидан жой олди.
Пара пауэрлифтинг бўйича эркаклар ўртасида 80 килограмм вазн тоифасида Бекзод Жамилов финалда 229 килограмм тошни кўтариб, олтин медалга сазовор бўлди. Аёллар ўртасида 67 килограмм вазн тоифасида эса Рухшона Ўктамова ғолибликни қўлга киритди.
Ўзбекистон делегацияси мусобақалардаги муваффақиятли иштирокини давом эттирмоқда. Айни пайтда жамоамиз умумжамоа ҳисобида иккинчи ўринда бормоқда.
