Маълумки, савдо нуқталарида назорат-касса машиналари орқали харидорларга бериладиган чекларда маҳсулот ва хизматларга оид кўплаб маълумотлар, жумладан, МХИК кодлари, ўлчов бирликлари, ҚҚС суммаси, чегирмалар, солиқ ставкалари ва бошқа реквизитлар акс эттирилади.
Мазкур маълумотлар ҳисоб-китобларнинг шаффофлиги ва назоратини таъминлаш учун муҳим бўлса-да, уларнинг кўплиги айрим ҳолларда фуқаролар учун чекни ўқиш ва харид суммасини тезда англашда ноқулайлик туғдириши, ҳатто ҳисоб-китобларда адашиш ҳолатларига олиб келиши мумкин.
Шу муносабат билан Солиқ қўмитаси томонидан чекларни фуқаролар учун янада тушунарли ва қулай шаклда кўриш имконияти жорий этилди.
Энди электрон чекни тўлиқ ёки соддалаштирилган шаклда кўриш мумкин.
Соддалаштирилган кўринишда чекда фуқаро учун энг зарур бўлган асосий маълумотлар — харид қилинган маҳсулот (хизмат) номи ва унинг суммаси, шунингдек, чекнинг якуний суммаси ихчам шаклда акс эттирилади. Бу харидорга чекдаги асосий маълумотларни ортиқча реквизитлар орасида адашмасдан тез ва осон кўриш имконини беради.
Бунда чекнинг тўлиқ кўринишидаги маълумотлар ҳам сақланиб қолади. Фойдаланувчи ўзига қулай бўлган форматни мустақил танлаши ва исталган вақтда тўлиқ ҳамда соддалаштирилган кўринишларни ўзгартирган ҳолда кўриш мумкин.
Шунингдек, электрон чек нусхасини сақлаш ва бошқа фойдаланувчилар билан улашиш имконияти ҳам мавжуд.
Чекни қандай текшириш мумкин?
Электрон фискал чек ҳақидаги маълумотларни икки усулда текшириш мумкин:
смартфон камераси орқали чекдаги QR-кодни сканерлаш;
Солиқ мобил иловаси орқали текшириш.
Солиқ қўмитаси фуқароларга харидлар бўйича ҳисоб-китобларни текширишда расмий электрон хизматлардан фойдаланишни тавсия этади. Бу ортиқча ҳисоб-китобларни амалга ошириш заруратини камайтиради, шунингдек, чегирмалар, солиқлар ва бошқа ҳисоб-китоб элементлари инобатга олинмаган ҳолда мустақил қайта ҳисоблаш натижасида юзага келиши мумкин бўлган хатоларнинг олдини олишга хизмат қилади.
Солиқ қўмитаси фуқаролар ва тадбиркорлик субъектлари учун солиқ хизматларини янада қулай, тушунарли ва шаффоф қилиш, рақамли технологиялардан фойдаланиш имкониятларини кенгайтириш борасидаги ишларни изчил давом эттиради.
