Ички ишлар вазирлиги Тезкор-қидирув департаменти ҳамда Иқтисодий жиноятларга қарши курашиш департаментининг Учтепа туман бўлими ходимлари ҳамкорлигида «Хавфсиз ва соғлом юрт» кенг қамровли тезкор-профилактик тадбирлари доирасида текширув ўтказилди.
Тошкент вилоятининг Янгийўл шаҳрида ўтказилган тезкор тадбир давомида 1989 йилда Хоразм вилоятида туғилган газ таъминоти ходими ва унинг шериги — 1972 йилда туғилган, муқаддам Жиноят кодексининг 184-моддаси билан судланган тадбиркор ушланди.
Аниқланишича, улар ўзаро жиноий тил бириктириб, хорижда ишлаб чиқарилган, яроқлилик муддати ўтган, фойдаланишга яроқсиз ва хавфсизлик талабларига жавоб бермайдиган иситиш қозонларини сохта ҳужжат ҳамда сертификатлар билан сотишган.
Шахслар 120 та иситиш мосламасини ҳар бирини 380 АҚШ долларидан ҳисоблаб, жами 45 минг долларга сотган вақтида ашёвий далиллар билан қўлга олинган.
Тезкор тадбир давомида тадбиркорнинг яшаш хонадони ҳам кўздан кечирилган. Натижада у ерда хориждан келтирилган, хавфсизлик талабларига жавоб бермайдиган турли номдаги яна 500 та иситиш мосламаси ноқонуний сақланаётгани аниқланган ва ҳужжатлаштирилган.
Мазкур ҳолат юзасидан иситиш мосламаларини ноқонуний сотган шахсларга нисбатан Жиноят кодексининг 186¹-моддаси билан жиноят иши қўзғатилган.
Ички ишлар вазирлиги фуқароларни иситиш қозонлари ва мосламаларини сертификат ҳамда кафолат ҳужжатларига эга расмий дўконлардан харид қилишга чақирди. Шунингдек, шубҳали шахслар томонидан қўлма-қўл сотилаётган, ишлатилган ва арзон нархдаги маҳсулотлардан эҳтиёт бўлиш, ускуналарни ўрнатиш ва уларга хизмат кўрсатишни фақат малакали мутахассисларга ишониш зарурлиги эслатилди.
