Адлия вазирлиги томонидан «Банкларни санация қилишда баҳолаш ўтказиш тартиби тўғрисида»ги идоравий ҳужжат давлат рўйхатидан ўтказилди. Ҳужжат 2026 йил 10 сентябрда 3938-сон билан рўйхатга олинган.
Унга кўра, банкларни санация қилиш учун, шунингдек, санациядан кейин акциядорлар ва кредиторларнинг зарарларини аниқлаш мақсадида баҳолаш ўтказилади.
Мазкур тартиб банклар гуруҳлари ҳамда банк акцияларининг назорат пакетларига эгалик қилувчи холдинг компанияларига ҳам татбиқ этилади.
Марказий банк дастлабки танланган баҳоловчи ташкилотлар рўйхатини шакллантиради. Баҳоловчи ташкилотларнинг мурожаатлари 2 ойда кўриб чиқилади, рўйхат эса йилига камида бир марта қайта кўриб чиқилади.
Баҳолаш бўйича таклифлар 15 иш кунида кўриб чиқилиб, ташкилотнинг тажрибаси, имкониятлари, баҳолаш муддати ва хизмат ҳақи инобатга олинган ҳолда танлов амалга оширилади.
Баҳоловчи ташкилотларга мустақиллик, малака, фуқаролик жавобгарлигини суғурталаш ва ахборот хавфсизлиги бўйича талаблар қўйилади. Шунингдек, манфаатлар тўқнашувини аниқлаш ва бошқариш тартиби белгиланади.
Санация жараёнида банкнинг активлари, мажбуриятлари ва балансдан ташқари моддалари баҳоланади.
Тўлиқ баҳолашни ўтказишга тўсқинлик қилувчи ҳолатлар мавжуд бўлганда Марказий банк ёки у тайинлаган баҳоловчи томонидан дастлабки баҳолаш ўтказилади. Кейинчалик баҳоловчи ташкилот имкони борича қисқа муддатда якуний баҳолашни амалга оширади.
Санациядан кейин акциядорлар ва кредиторларнинг амалда олган қиймати банк мажбурий тугатилган тақдирда олиши мумкин бўлган қиймат билан таққосланади. Шу асосда санация натижасида уларнинг зарари кўпайган ёки кўпаймагани аниқланади.
Баҳолаш харажатлари банкнинг молиявий ҳолати имкон берса, банк ҳисобидан, акс ҳолда Марказий банк ҳисобидан тўланади. Кейинчалик ушбу харажатлар банкдан ундирилади.
Баҳолаш ҳисоботи Марказий банкка тақдим этилади. Ҳисоботнинг қисқача мазмуни эса эълон қилинади.
