Андижон вилояти ҳокими Шуҳратбек Абдураҳмонов бошчилигидаги делегациянинг Беларусьга амалий ташрифи доирасида лойиҳага старт берилди.
Мажмуа Городок туманидаги Клюшово қишлоғида барпо этилади. Агрокластер шаклида амалга ошириладиган лойиҳа доирасида чорвачилик ва гўшт етиштириш инфратузилмаси билан бир қаторда турар жойлар мажмуасини ҳам ташкил этиш режалаштирилган.
Қурилиш ишларининг бошланишига бағишланган маросимда Андижон вилояти ҳокими Шуҳратбек Абдураҳмонов, Ўзбекистоннинг Беларусьдаги Фавқулодда ва Мухтор элчиси Нуриддин Мамажонов ҳамда Витебск вилояти ижроия қўмитаси раиси Александр Рогожник иштирок этди. Тадбирда лойиҳа бошланганини ифодаловчи рамзий капсула жойлаштирилди.
Маросим якунида икки халқ ўртасидаги дўстлик ва ҳамкорлик рамзи сифатида қизил баргли дуб кўчатлари экилди.
Мазкур лойиҳа Ўзбекистон ва Беларусь ўртасидаги иқтисодий ҳамкорликни кенгайтириш, қишлоқ хўжалигида тажриба алмашиш ва сармоявий алоқаларни ривожлантиришга қаратилган.
