Хизмат сафари давомида делегация Беларуснинг етакчи олий таълим муассасалари ва йирик саноат корхоналарида бўлиб, таълим, илм-фан, инновациялар ҳамда ишлаб чиқариш интеграциясини ривожлантиришга қаратилган қатор муҳим учрашув ва музокараларни ўтказди.
Делегация дастлаб Беларусь Миллий техника университети (БМТУ) раҳбарияти билан музокаралар олиб борди. Учрашувда қўшма таълим дастурларини кенгайтириш, масофавий таълимни ривожлантириш, академик мобилликни фаоллаштириш, илмий-тадқиқот йўналишидаги ҳамкорликни мустаҳкамлаш ҳамда энергетика, қурилиш ва бошқа устувор соҳаларда малакали кадрлар тайёрлаш масалалари муҳокама қилинди. Шунингдек, ўзбекистонлик талабалар учун Беларусь корхоналарида ишлаб чиқариш амалиётларини ташкил этиш, халқаро грантлар ва қўшма илмий лойиҳаларни амалга ошириш юзасидан келишувларга эришилди. Ташриф доирасида делегация университетнинг замонавий илмий-таълим марказлари ва илғор лабораториялари фаолияти билан ҳам танишди.
Шунингдек, Беларусь Миллий техника университетида фаолият юритаётган Ўзбекистон–Беларусь миллий маркази фаолияти билан танишилди. Мазкур марказ икки халқнинг бой маданий мероси, урф-одат ва анъаналарини тарғиб этиш, маданий-гуманитар алоқаларни янада ривожлантириш ҳамда ёшлар ўртасидаги ўзаро ҳамкорликни мустаҳкамлашга хизмат қилмоқда.
Делегациянинг навбатдаги манзили Беларусь давлат информатика ва радиотехника университети (БГУИР) бўлди. Музокараларда сунъий интеллект, ахборот технологиялари, рақамлаштириш, инновацион фаолият, академик мобиллик, профессор-ўқитувчилар ва талабалар алмашинуви, қўшма таълим дастурлари ҳамда илмий-тадқиқот лойиҳаларини амалга ошириш истиқболлари юзасидан фикр алмашилди. Делегация университет ҳузуридаги Илмий-таълим инновацион маркази фаолияти, замонавий лабораториялар ва инновацион ишланмалар билан яқиндан танишди.
Хизмат сафари давомида Евфросиния Полотская номидаги Полотск давлат университети билан ҳам самарали музокаралар олиб борилди. Учрашув якунида икки олий таълим муассасаси ўртасида ҳамкорлик меморандуми имзоланди. Шунингдек, 9 та таълим йўналиши бўйича қўшма ўқув режалари ва таълим дастурлари тасдиқланиб, 2026–2027-ўқув йилидан бошлаб қўшма таълим дастурларини амалга оширишга келишиб олинди. Томонлар қўшма факультет ташкил этиш, академик мобилликни кенгайтириш, қўшма илмий лойиҳалар ҳамда замонавий илмий-таълим лабораторияларини ташкил этиш масалаларини ҳам муҳокама қилдилар.
Делегация Беларусь Республикасининг йирик саноат корхоналаридан бири — НАФТАН нефтни қайта ишлаш заводи фаолияти билан ҳам танишди. Ташриф давомида замонавий ишлаб чиқариш технологиялари, саноатни модернизация қилиш тажрибаси, юқори технологияли ишлаб чиқариш тизимлари ҳамда илм-фан ва саноат интеграциясининг илғор намуналари ўрганилди. Мазкур тажриба келгусида университет ва саноат корхоналари ўртасидаги амалий ҳамкорликни ривожлантириш учун муҳим асос бўлиб хизмат қилади.
Шунингдек, Могилёв Давлат озиқ-овқат ва кимёвий технологиялар университети раҳбарияти билан ўтказилган учрашувларда қўшма таълим дастурлари, икки дипломли таълимни ривожлантириш, қўшма илмий-тадқиқот лойиҳалари, профессор-ўқитувчилар алмашинуви, академик мобиллик ҳамда қўшма факультет ташкил этиш истиқболлари муҳокама қилинди. Музокаралар якунида стратегик шерикликни янада мустаҳкамлашга қаратилган тегишли ҳужжатлар имзоланди.
Мазкур хизмат сафари давомида эришилган келишувлар Бухоро давлат техника университетининг халқаро ҳамкорлик географиясини янада кенгайтириш, таълим ва илм-фан соҳасида халқаро стандартларни жорий этиш, қўшма таълим дастурлари ва илмий-тадқиқот лойиҳаларини ривожлантириш, талабалар ва профессор-ўқитувчиларнинг академик мобиллигини ошириш ҳамда саноат ва олий таълим интеграциясини мустаҳкамлаш йўлида муҳим қадам бўлди.
Беларусь Республикасига амалга оширилган мазкур хизмат сафари Ўзбекистон ва Беларусь ўртасидаги стратегик шериклик муносабатларини амалий мазмун билан бойитиш, олий таълим ва илм-фан соҳасидаги ҳамкорликни янги босқичга олиб чиқиш ҳамда Президентимиз томонидан белгилаб берилган халқаро ҳамкорликни кенгайтириш вазифаларининг изчил ижросини таъминлашга хизмат қиладиган муҳим натижаларни берди.
Ҳамкорлик материали
