Бугун жаҳон иқтисодиётида глобаллашув жараёнларининг кучайиши, электрон тижоратнинг жадал ривожланиши, трансчегаравий савдонинг кенгайиши ва маҳсулотлар турининг кўпайиши улар хавфсизлигини таъминлашда янги ёндашувларни талаб қилмоқда.

Мазкур қонун мамлакатда техник жиҳатдан тартибга солиш тизимини тубдан ислоҳ қилиш, маҳсулотлар хавфсизлигини таъминлаш ва истеъмолчилар ҳуқуқларини самарали ҳимоя қилишга қаратилган.

Ҳужжат Жаҳон савдо ташкилотининг Савдодаги техник тўсиқлар тўғрисидаги битими ҳамда халқаро илғор амалиёт талаблари асосида ишлаб чиқилган.

Қонуннинг муҳим талабларидан бири — бозорга чиқариладиган барча маҳсулотлар хавфсиз бўлиши шарт.

Маҳсулот хавфсизлиги учун ишлаб чиқарувчилар, импорт қилувчилар ва иқтисодий операторлар бевосита масъул бўлади.

Иқтисодий операторларга маҳсулот хавфини баҳолаш, техник ҳужжатларни юритиш, товарни идентификация қилиш, истеъмолчилардан келиб тушган мурожаатларни ҳисобга олиш ва хавфли маҳсулотларни бозордан қайтариб олиш каби аниқ мажбуриятлар юкланмоқда.

Яна бир муҳим янгилик — бозор назоратини хавф-хатарларга асосланган тарзда ташкил этиш механизми жорий қилинади. Бу орқали хавфли маҳсулотларни тезкор аниқлаш ва уларни муомаладан чиқариш имконияти кенгаяди.

Шунингдек, хавфли маҳсулотлар ҳақида ахборот алмашиш учун миллий ахборот алмашинуви тизими ташкил этилади.

Сенаторлар фикрича, янги тартиблар аҳоли ҳаёти ва соғлиғини муҳофаза қилиш билан бирга, маҳаллий маҳсулотларнинг рақобатбардошлиги ва экспорт салоҳиятини оширишга ҳам хизмат қилади.

Қонуннинг қабул қилиниши мамлакат техник жиҳатдан тартибга солиш тизимини халқаро стандартларга яқинлаштириш, ички бозорда хавфсиз маҳсулотлар муомаласини таъминлаш ва истеъмолчиларнинг хавфли товарлардан ҳимоясини кучайтириш учун ҳуқуқий асос яратади.

Муҳокама якунида сенаторлар қонунни маъқуллади.