Бу жараёнда кўчатларнинг ҳудуд иқлимига мослигини таъминлаш, уларни ўз вақтида суғориш ва мунтазам парваришлашга алоҳида эътибор қаратилади.
ОАВ учун Контент тайёрлаш марказида ўтказилган брифингда Ўрмон ва яшил ҳудудларни кўпайтириш, чўлланишга қарши курашиш агентлиги директорининг ахборот сиёсати масалалари бўйича маслаҳатчиси Исматулла Дўстмуродов кузги мавсумда амалга ошириладиган ишлар ҳақида маълумот берди.
Унинг қайд этишича, лойиҳа доирасида «3–30–300» халқаро стандарти жорий этилади. Шунингдек, 2026 йил куз мавсумида 257 та «Яшил боғ» ва «Яшил жамоат парки» барпо этилади. 2030 йилга қадар бундай боғлар сонини 1 023 тага етказиш режалаштирилган.
Ҳар бир туман ва шаҳарда 2030 йилга қадар камида бешта, узунлиги 10 километрдан кам бўлмаган сояли сайр кўчалари ташкил этилади.
Кўчат экиш ҳудудлар кесимида қуйидаги саналардан бошланади:
- 1 ноябрь — Қорақалпоғистон Республикаси ва Хоразм вилоятида;
- 5 ноябрь — Бухоро ва Навоий вилоятларида;
- 10 ноябрь — Андижон, Жиззах, Самарқанд, Сирдарё, Наманган, Тошкент, Фарғона вилоятлари ва Тошкент шаҳрида;
- 20 ноябрь — Сурхондарё ва Қашқадарё вилоятларида.
Маҳаллаларда кўчат экиш ва парваришлаш ишларини ташкил этиш учун 2026 йил 1 октябрдан бошлаб, қарийб 4 200 нафар «ўрмончи мураббий» республикадаги 8 992 та маҳаллага бириктирилган. Улар аҳолига кўчат экиш, парваришлаш ва маҳалла буюртмаларини шакллантиришда кўмаклашади.
2027 йил 1 январдан ҳар бир маҳалла буюртмаси асосида «Маҳаллани яшиллаштириш» пакети жорий этилади. «Яшил — маҳалла» дастури доирасида маҳаллалар кўчатлар, органик ўғит, тежамкор суғориш воситалари билан таъминланади. Шунингдек, кўчатларни касаллик ва зараркунандалардан ҳимоя қилиш хизматлари йўлга қўйилади.
2026 йил кузидан бошлаб, ер майдони чекланган маҳаллаларда, кўп квартирали уйлар орасида, мактаб ва боғчалар ҳовлисида маҳалла микроўрмонлари ташкил этилади. Ер ажратиш имкони бўлмаган ёки бетон ва асфальт қопламали ҳудудларда эса жамоатчилик кичик боғларини яратиш назарда тутилган.
Шунингдек, 2026 йил 1 ноябрга қадар туман ва шаҳарларнинг яшил дастурлари ишлаб чиқилади. Уларда яшил боғлар, сояли сайр кўчалари, кўллар ҳамда ёмғир, қор ва оқова сувларини тўплаш ва қайта ишлашга мўлжалланган сув тежовчи суғориш тизимларини ташкил этиш белгиланган. Кейинги йилларда бундай дастурлар ҳар йили 1 мартга қадар ишлаб чиқилади.
2027 йил 1 январдан аҳоли ташаббусларини қўллаб-қувватлаш мақсадида «Яшил лот» тизими ҳам жорий этилади. Унга кўра, мавжуд ер участкалари жисмоний ва юридик шахсларга шартнома асосида ном бериш орқали яшил боғлар барпо этиш учун ажратилади. Бунда ерлар мулк сифатида берилмайди, қурилиш ва турли конструкциялар ўрнатиш тақиқланади. Ҳудудлардан фақат белгиланган мақсадда фойдаланишга рухсат этилади.
