Бугун, 25 июнь куни 2026/2027-ўқув йили учун давлат олий таълим муассасаларига кириш бўйича онлайн рўйхатдан ўтиш якунланади.
Абитуриентлар my.uzbmb.uz платформаси орқали соат 23:59 га қадар рўйхатдан ўтишлари ёки аввал киритилган маълумотларини таҳрирлашлари мумкин. Тўлов амалга оширилган бўлса ҳам, маълумотларни бугун кун якунига қадар ўзгартириш имконияти мавжуд. Белгиланган муддатдан сўнг эса маълумотларни таҳрирлашнинг имкони бўлмайди.
Шу боис абитуриентларга қабулнинг сўнгги дақиқаларини кутмасдан, имкон қадар эртароқ рўйхатдан ўтиш тавсия этилади. Кун охирида тизимга юклама ортиши натижасида техник узилишлар юзага келиши мумкин.
Рўйхатдан ўтишда фанлар мажмуаси, таълим тили ва тест топшириш ҳудудини танлашда эътиборли бўлиш, шунингдек, тест синовида иштирок этиш учун тўловни ўз вақтида амалга ошириш лозим. Тўловдан озод этилган тоифалар бундан мустасно. Тўлов қилинмаган тақдирда абитуриент тест синовларига киритилмайди.
Шунингдек, киритилган маълумотлар ҳамда тўлов ҳолатини шахсий кабинет орқали текшириб олиш тавсия этилади.
Билимни баҳолаш агентлиги маълумотига кўра, 25 июнь куни соат 08:05 ҳолатида давлат олий ва касбий таълим муассасаларига қабул учун 681 минг 450 нафар абитуриент онлайн рўйхатдан ўтган.
Рўйхатдан ўтганларнинг 432 минг 979 нафари жорий йил битирувчилари бўлса, 248 минг 471 нафари аввалги йилларда таълим муассасаларини тамомлаган талабгорлардир.
Жинслар кесимида таҳлил қилинганда, абитуриентларнинг 365 минг 733 нафари (53,7 фоиз) аёллар, 315 минг 717 нафари (46,3 фоиз) эркаклардан иборат.
Таълим тили бўйича энг катта улуш ўзбек тилига тўғри келади. Натижалар қуйидагича:
Ўзбек тили — 603 000 нафар (88,5 фоиз)
Рус тили — 63 693 нафар (9,3 фоиз)
Қорақалпоқ тили — 130319 нафар (2,0 фоиз)
Бошқа тиллар — 1 438 нафар (0,2 фоиз)
Ҳудудлар кесимида энг кўп абитуриент Тошкент шаҳрида қайд этилган бўлиб, уларнинг сони 116 минг 882 нафарга етган. Кейинги ўринларда Самарқанд вилояти (73 минг 677 нафар), Фарғона вилояти (67 минг 342 нафар), Қашқадарё вилояти (60 минг 650 нафар) ва Андижон вилояти (58 минг 564 нафар) қайд этилган.
Шунингдек, Наманган вилоятидан 50 минг 667 нафар, Сурхондарё вилоятидан 48 минг 812 нафар, Хоразм вилоятидан 45 минг 549 нафар, Жиззах вилоятидан 35 минг 754 нафар, Бухоро вилоятидан 32 минг 161 нафар, Навоий вилоятидан 31 минг 892 нафар, Қорақалпоғистон Республикасидан 31 минг 883 нафар ҳамда Сирдарё вилоятидан 21 минг 749 нафар абитуриент рўйхатдан ўтган.
Энг кам кўрсаткич Нурафшон шаҳрида (Тошкент вилояти) қайд этилиб, 5 минг 868 нафар абитуриент ҳужжат топширган.
Эслатиб ўтамиз, абитуриентлар @мандат_жавоббот ёрдамида ОТМлар, таълим йўналишлари ва ўтиш баллари билан танишишлари мумкин. Шунингдек, @синовтестуз_бот орқали диагностик тестларни ишлаб, ўз билимларини бепул синовдан ўтказиш имкониятига эга.
