Ўзбекистон Республикаси Президентининг 2026 йил 25 мартдаги “Атмосфера ҳавоси сифатини яхшилашга қаратилган “Тоза ҳаво” умумиллий лойиҳасини амалга ошириш бўйича чора-тадбирлар тўғрисида”ги 46-сон Фармонига кўра, 2026 йилнинг 1 май кунидан бошлаб ҳар ойнинг 10 ва 25-саналарида “Автомобилсиз кун” ва “Автомобилсиз ҳафта” акциялари ўтказиб борилиши белгиланган.
Фармонга кўра, давлат ташкилотлари ва идоралари ходимлари томонидан акция ўтказиладиган кунларда хизмат автотранспорт воситаларидан фойдаланиш қатъиян тақиқланади ва ушбу саналар иш кунларига тўғри келганда ҳайдовчиларнинг иш ҳақи сақлаб қолинади.
Мазкур ташаббус автомобиллардан чиқадиган зарарли газларни камайтириш орқали аҳоли саломатлигини муҳофаза қилиш, соғлом турмуш тарзини тарғиб қилиш, атмосфера ҳавосига чиқарилаётган зарарли моддалар миқдорини қисқартириш ва экологик барқарор муҳитни шакллантириш ҳамда жамоат транспорти ва экологик тоза транспорт воситаларидан фойдаланиш маданиятини кенг оммалаштиришга хизмат қилади.
Акцияни юқори савияда ташкил этиш ва мувофиқлаштириш бўйича Махсус комиссиянинг тегишли баёни қабул қилинди. Унга мувофиқ давлат фуқаролик хизматчилари томонидан “Автомобилсиз кун” ва “Автомобилсиз ҳафта” акцияси доирасида хизмат автотранспорт воситаларидан фойдаланиш мазкур ходимлар томонидан одоб-ахлоқ (этика) қоидаларининг бузилишига тенглаштирилди. Белгиланган талабларга риоя этмаслик давлат органлари ва ташкилотлари раҳбарларига улар раҳбарлик қилаётган ташкилотларда фаолият юритаётган давлат фуқаролик хизматчиларини интизомий жавобгарликка тортиш учун асос бўлади.
Маълумот учун, Ўзбекистон Республикаси Президентининг 2025 йил 25 ноябрдаги “Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги ПФ–229-сон Фармонига асосан Махсус комиссиясига транспорт воситалари ҳаракатини чеклаш бўйича ваколат берилган. Махсус комиссия томонидан қабул қилингин қарор ва кўрсатмалар барча давлат органлари ва ташкилотлари, юридик ва жисмоний шахслар учун мажбурий ҳисобланади.
“Автомобилсиз кун” акцияси доирасида вазирлик ва идоралар, маҳаллий давлат ҳокимияти органлари, таълим муассасалари ҳамда кенг жамоатчиликнинг фаол иштироки муҳим аҳамиятга эга. Шунингдек, мазкур кунларда экологик маданиятни оширишга қаратилган тарғибот тадбирлари, оммавий юришлар ва жамоатчилик акциялари ташкил этиб келинмоқда.
