Халқаро анжуманлар саройида ташкил этилган очилиш маросимида Ўзбекистон Республикаси Президенти Администрацияси раҳбарининг таълимни ислоҳ қилиш бўйича ўринбосари Илҳом Сираджев, Мактабгача ва мактаб таълими вазири Эъзоза Каримова, таълим соҳаси мутасаддилари, олимпиада иштирокчилари, хорижий давлатлар элчихоналари ходимлари, шунингдек, ўлкамиз ҳамда хорижий оммавий ахборот воситалари вакиллари иштирок этди.
Таъкидланишича, 10-19 июль кунлари давом этадиган олимпиадада 90 дан ортиқ давлатдан қарийб 1 000 нафар ўқувчи, жамоа раҳбарлари, халқаро илмий қўмита аъзолари, кузатувчилар ва меҳмонлар қатнашмоқда. Бу эса “IChO-2026”ни нафақат йилнинг энг йирик таълим олимпиадаларидан бири, балки ёш олимларни бирлаштирувчи глобал илмий майдонга айлантирмоқда.
1968 йилдан буён ўтказиб келинаётган Халқаро кимё олимпиадаси мактаб ўқувчилари ўртасидаги энг нуфузли фан беллашувларидан бири ҳисобланади. Унда иштирокчилар чуқур назарий билимлари ва лабораториядаги амалий кўникмаларини халқаро стандартлар асосида намойиш этади. Шу билан бирга, олимпиада турли давлатлар ёшлари ўртасида илмий ҳамкорликни кенгайтириш, тажриба алмашиш ва дўстона алоқаларни мустаҳкамлашга хизмат қилади.
Қайд этиш жоизки, республикамизнинг ушбу мусобақага мезбонлик қилиши мамлакатда сўнгги йилларда таълим тизимини такомиллаштириш, иқтидорли ёшларни қўллаб-қувватлаш ва халқаро фан олимпиадаларига тайёрлаш бўйича амалга оширилаётган ислоҳотларнинг мантиқий натижасидир.
Давлатимиз раҳбарининг 2024 йил 30 сентябрдаги қарори билан ташкил этилган Фан олимпиадалари маркази томонидан халқаро стандартларга мувофиқ, олимпиадаларга тайёргарлик тизими йўлга қўйилди, замонавий лабораториялар барпо этилди, хорижий экспертлар жалб қилиниб, миллий терма жамоалар учун самарали тайёргарлик муҳити яратилди.
Эътиборлиси, бу саъй-ҳаракатлар ўз самарасини бермоқда. Жумладан, 2025 йилда Ўзбекистон ўқувчилари 29 та халқаро фан олимпиадасида иштирок этиб, 210 та медаль – 40 та олтин, 78 та кумуш ва 92 та бронза медалини қўлга киритди. Бу натижалар диёримизда иқтидорли ёшлар билан ишлаш тизими сифат жиҳатидан янги босқичга кўтарилганини яққол намоён этмоқда.
IChO-2026га тайёргарлик ишлари икки йил давомида изчил олиб борилди. Саудия Арабистони ва Бирлашган Араб Амирликларида ўтказилган олимпиадалар тажрибаси ўрганилди, расмий веб-сайт ва логотип яратилди, халқаро делегациялар учун махсус ахборот платформаси ишлаб чиқилди. Шунингдек, лабораториялар энг замонавий ускуналар билан жиҳозланди, халқаро илмий қўмита таркибига Ҳарвард университети, ETH Zurich, Билкент университети, М.В. Ломоносов номидаги Москва давлат университети ва Прага кимё ва технология университети каби дунёнинг етакчи илмий муассасалари олимлари жалб этилди.
Умуман олганда, IChO-2026 нафақат билимлар беллашуви, балки Янги Ўзбекистоннинг илм-фан ва таълим соҳасида эришган ютуқларини акс эттирувчи тарихий воқеа сифатида ҳам муҳим аҳамият касб этади.
